戲哥之日常#126 │ 瘋狂喜劇

朋友不停游說豬視妹睇台灣喜劇電影《詭扯》，話入面有佢最鍾意嘅朝偉，依家Disney+仲有得睇。霸戲哥睇咗演員簡介，邊有朝偉啫，係咪搞錯咗？原來劉冠廷喺戲入面參照《無間道》陳永仁個look，左手手指不停輸入摩斯密碼（手抽筋），像極了朝偉。

呢套《詭扯》雖然係翻拍韓國電影《時失2公里》，但因為加入咗好多台灣元素，好似標童、滿天神佛、荒廢嘅檳榔攤，成齣戲又用台語包裝，睇落好台灣feel。故事講侯彥西偷咗黑幫嘅鑽石，逃到去某村莊，黑警陳柏霖奉黑幫之命，要喺48小時內搵番並交還。陳以文為首嘅村民，見到鑽石財迷心竅，用盡辦法使開陳柏霖，其時又有女鬼陳意涵搞亂檔，引發連串笑料。

成齣戲將警匪、動作、槍戰、宗教、民間傳說、怪力亂神等元素炒埋一碟，基本邏輯同物理完全套唔上，但種種荒謬串合埋一齊又毫無違和。呢類型嘅瘋狂喜劇，比較印象深刻要數到06年嘅《瘋狂的石頭》。

《詭扯》入面好多笑料，都係向港片致敬，睇得出導演許富翔係港產片fans。諗番轉頭，港產喜劇好似買少見少，似乎要加番幾把勁先得喎。

霸戲哥

** 博客文章文責自負,不代表本公司立場 **

就快5月，第75屆康城影展啱啱公佈入圍競逐最高榮譽金棕櫚獎嘅18部電影候選名單，可惜嘅係冇華語電影入圍，而康城常客、韓國導演朴贊郁，就憑《分手的決心》入圍，而套戲女主角就係湯唯，即係話佢有份爭康城影后。

《分手的決心》講述朴海日扮演嘅刑警，喺調查一宗神秘死亡案件，遇到死者嘅妻子湯唯，兩人逐漸產生複雜嘅情感。睇嚟又係朴贊郁最拿手嘅懸疑、愛情加復仇嘅戲碼。

湯唯近年深得韓國人歡心，10年佢同玄彬合演《晚秋》，一場吻戲迷倒韓國影迷之餘，亦為佢捧走多個韓國電影獎項。當然，佢亦因為呢套戲而認識咗導演，即現任老公金泰勇。

湯唯演技精湛就毋庸置疑嘅，唔知佢喺朴贊郁嘅調教下，有冇機會登上康城影后寶座呢，5月17號自有分曉。