霸戲哥之日常#147 │ 探索之魂

有人鍾意飛上太空探索宇宙，亦有人喜歡上山下海發掘生物，兩者性質雖有唔同，但理念都係一樣，都係為人類帶嚟多一點嘅知識，去證明我哋係高尚嘅智慧物種。

年過80嘅傳奇生物學家Bruce Means，霸戲哥讀大學時都聽過佢大名，佢最近為咗發掘新樹蛙品種，聯同一班專業登山者同探險家，深入亞馬遜森林深處，登上一個名為「平頂山」（Tepui）嘅高原，並製作咗齣紀錄片《攀登平頂山》，依家喺Disney+有得睇。

Tepui位於南美國家圭亞那（Guyana）同委內瑞拉（Venezuela）嘅邊境，因為佢係有300米高嘅懸崖，形成一個天然屏障，所以一直與世隔絕，起碼冇人類踏足。亦因為咁，呢度肯定有好多從未見過嘅生物，可以話係生物學家嘅寶庫，亦解釋到點解Bruce咁想喺有生之年，登上高原一探究竟。問題係，點樣攀上300米嘅懸崖呢？　

紀錄片記載住探險隊嘅艱苦旅程，睇見Bruce一步一步咁攀山涉水，幾乎連命仔都唔要，好可能只係為佢本樹蛙名冊加多幾個items而已，但原來已經彌足珍貴。

霸戲哥真係睇到好慚愧。如果當初唔係成日走堂，或者今日已經做咗生物學家。

霸戲哥

** 博客文章文責自負,不代表本公司立場 **

室友L個囝囝，平時唔多出聲，但一出聲多數都會大叫「To Infinity and Beyond」，所以我慣咗（暗地裏）叫佢巴斯。而每年聖誕我都可以煩少樣嘢，事關聖誕禮物必定係巴斯光年嘅相關產物，講講吓原來已經成十幾年前嘅事。巴斯依家都讀緊大學啦，唔知啲玩具掉晒未呢？

《Toy Story》出咗四集，今次終於輪到巴斯光年「擔正」，《光年正傳》將會喺今個盛夏6月16號上映，迪士尼日前就發佈埋最新預告。《光年正傳》可以話係一個獨立故仔，同《Toy Story》冇直接關係，主要係追溯番呢位太空英雄，點解受人仰慕到出品牌玩具。

故事講巴斯光年執行一次太空任務，意外同隊友被迫降落到距離地球420萬光年嘅星球上。為咗重返地球，巴斯光年同埋佢班隊友要穿越時空，點知中途又殺出佢死敵「索克天王」搞破壞。

斷估巴斯應該唔會同老竇睇架啦。室友L，見字可約我（笑）。