霸戲哥之日常#153 │ 金宵手記拾陸：真相

今集《吃播》主題圍繞兩個字——真相。人人都想要真相，但真相係，網絡世界係冇真相。真相係，人人都只會相信自己相信嘅就係真相。

網紅Jessica F.疑似被非法禁錮事件，阮兒聲稱係虛構，話其實係宣傳MIA隻新game 《Lost and Found》。相信Jessica F.被消失嘅丁子朗，梗係唔信呢個版本，為咗令件事繼續發酵，不惜自編自導自演咗條被人綁架嘅片放上網，結果連佢都不自覺成為咗捏造真相嘅人。

突然失蹤嘅伍樂怡，就話自己係去台灣散心，佢手嘅瘀傷就係跌親。霸戲哥認為一定有警轟嘅白彪，今集就冇再出現。

《吃播》結局留下好多問號：MIA係咪有重大陰謀？Jessica F.係咪真係失蹤？阮兒係咪有痛腳畀人捉住？《Lost and Found》係咪用嚟掩飾真相？白彪係咪真係離開咗香港？伍樂怡係咪都畀人非法禁錮？呢啲統統都冇答案，但就留畀觀眾自行詮釋。

霸戲哥認為呢集結局收得好靚，因為咁樣先對應得番個主題：人人都只會相信自己相信嘅就係真相。

霸戲哥

** 博客文章文責自負,不代表本公司立場 **

有冇諗過，當你80歲時會做啲咩？去公園捉棋？打草地滾球？定同孫仔飲茶呀？

原來80歲仲可以拍戲做主角。香港有謝賢，英國就有Anthony Hopkins。84歲嘅佢，上年先憑《爸爸可否不要老》拎咗奧斯卡影帝，最近有消息傳佢將會接拍新片《One Life》，成為英國主流電影圈中最大年紀嘅男主角。

呢套《One Life》其實係Sir Nicholas Winton嘅人物傳記。分享少少Nicholas Winton背景，喺二次大戰嗰陣，原本係倫敦證券交易員嘅佢，不斷從納粹黨手中秘密拯救咗669名兒童，所以又被稱為「英國舒特拉」（British Schindler） 。2015年，Nicholas喺睡夢中離世，享年106歲。

有指Anthony Hopkins接呢部戲，就係希望外界更加關注烏克蘭嘅難民問題。真係值得人尊敬呀。