博客文章
霸戲哥最近喺Netflix睇咗一套動畫《小太郎的一個人生活》，見到畫風仲以為類似《蠟筆小新》嗰類搞笑劇種，點知越睇越伏。個伏位係劇集不但止唔易入口，仲要係極之沉重，睇完個心好似被掏空一樣咁痛，哭相十分慘烈。
一日最衰霸戲哥太孤陋寡聞，《小太郎一個人生活》其實喺日本好出名，佢係改編自2015年推出、由津村麻美創作嘅同名漫畫，依家仲喺《Big Comic Superior》連載緊。故事講小太郎一個人搬入清水某公寓生活，每集都圍繞住佢同鄰居嘅一啲生活逸事，慢慢揭露小太郎嘅悲慘身世。
小太郎雖然只有四歲，仲讀緊幼稚園，但已經有看破紅塵嘅心境，心智比好多成年人都要成熟（至少比佢啲鄰居成熟）。係乜嘢事令小太郎一夜長大？呢個就係霸戲哥一口氣追晒十集嘅原因。
我哋成年人遇少少問題就怨天怨地，其實真係身在福中不知福。大家不妨窺探下小太郎嘅內心世界，學吓佢點樣用正能量去克服困境，或者大家會有另一番體會。
霸戲哥
** 博客文章文責自負,不代表本公司立場 **
《金宵大廈2》今晚大結局，跟一般TVB劇好唔同，佢冇好老土咁交代眾人去向，反而灌輸更多哲學概念，同埋一啲意有所指嘅暗喻，迫觀眾時刻思考，某啲細節位可能要「二刷」先留意到。
呢集張彥博終於意識到，無論佢去幾多個唔同嘅平行世界，都只不過係不斷循環，結局係永遠唔能夠真正擁有屬於佢嘅李施嬅。與其睇住心愛嘅人經歷無限輪迴嘅枉死，倒不如放下執着讓愛，成功拯救到現實世界嘅李施嬅（Ella）。
另一邊廂喺鏡世界嘅李施嬅（Lydia）同陳山聰（Joey），無論幾努力去改變命運，一切又返番去循環，開始感到迷失同無助，Lydia甚至想到尋死。喺最迷失嘅時候，又畀佢哋遇到《金宵大廈》嘅劉江（彩蛋），向佢哋解說呢個世界冇絕對嘅圓，總會有不完美嘅缺口，只要搵到呢個突破點，那怕係億萬分之一機會，都有可能結束循環。
於是，Lydia決定死守鏡世界，但唔係認命，而係鬥長命，佢深信有一天會重遇現實世界嘅陳山聰（Maurice），而佢嘅記憶，亦係佢哋曾經相愛嘅證明。
至於Joey就決定四處尋找突破點，去扭轉Ella嘅命運，而觀眾亦喺呢個時候知道六十年代被困精神病院、病人編號19916嘅陳山聰，就係利用瀕死穿梭時空嘅Joey。而所謂嘅突破點，就係利用故仔感動到六十年代嘅李施嬅，令佢向醫學權威提出廢除禁止電擊人體腦袋，呢個咁麻木不仁嘅治療手法。
畢竟人類嘅記憶，無論身處喺邊一個時空，都係存在嘅證明，唔可以話刪就刪。
