博客文章
大家話睇唔明《金宵大廈2》， 好啦，TVB徇眾要求，畀番啲易入口嘅劇集大家送飯。緊接《金宵》嘅係由馬德鐘、湯洛雯同賴慰玲主演嘅《雙生陌生人》，走搞笑路線，輕輕鬆鬆唔使用腦笑完又一day，正。
啱啱播出第一集，例牌交代吓啲角色咁，套劇以「撞樣」為主題，律師高收成（馬德鐘）同地獄黑仔王巫祺男（又係馬德鐘）就係生得一模一樣，連iphone嘅人物識別鎖都分唔到。黑仔版馬德鍾可塑性幾高，霸戲哥終於唔使睇佢扮專業人士。去到最尾一節，湯洛雯女神look出場，連登仔又有話題啦。
馬德鐘以前就一直畀人話係「萬能key」，任何相片都可以key到佢個樣上去。唔知監製係咪睇中呢點而搵佢演呢個角色呢？
霸戲哥
** 博客文章文責自負,不代表本公司立場 **
唔知係咪霸戲哥錯覺，@netflix最近特別多動畫電影，可能想搶年輕人市場啩。最近就有套日本奇幻動畫《泡泡》上架。
自從新海誠套《你的名字》爆紅之後，開創咗日本動畫嘅新派畫風，呢種結合實景同少少科幻色彩嘅畫面，頗受年輕一輩歡迎。霸戲哥都因為呢種畫風被吸引咗入嚟。
《泡泡》個世界觀設定都幾得意，講述五年前東京產生天降泡泡嘅奇怪現象，繼而發生大爆炸，死傷無數。東京從此變得不一樣，城市被奇怪重力圍繞，雜物會懸浮空中，泡泡爆破後變成水，浸晒成個東京。城市人開始遷離，留下來嘅都係一班劫後餘生嘅倖存者，或者被成人拋棄嘅孤兒。佢哋生存嘅唯一目標，就係參與一個類似rooftopping、又名為「東京跑酷」嘅運動，贏取生活所需品。主角「響」就係大爆炸嘅倖存者，佢性格孤僻，沉默寡言，直至遇到一位神秘少女「詩」，先至慢慢重拾返人生樂趣。
如果純講劇情，《泡泡》其實唔太合格，佢只不過係《美人魚》嘅變奏版，build up嘅感情都唔算細膩。但講到畫質，幾本上每個畫面都令人賞心悅目，尤其到東京跑酷比賽，鏡頭運動同分鏡都做得極之出色，相信 動畫迷應該收貨。
