霸戲哥之日常#172 │ 殺人鯨

一齣2013年嘅紀錄片《殺人鯨奪命控訴》，最近喺 @netflix 上架。呢套扭轉普遍人類對保育概念嘅電影，霸戲哥認為好值得大家花過零鐘頭去睇。

套戲根據明星殺人鯨Tilikum殺人事件講起，2010年一次表演期間突然狂性大發，當眾殺死一名女訓練員，震驚全美。當時有專家認為係女訓練員嘅疏忽所致（留咗馬尾），死因無可疑，但導演Gabriela Cowperthwaite唔認為係咁。於是佢喺慘劇發生嘅三年後，窮追不捨咁訪問相關人士同蒐集證據，了解殺人鯨殺人嘅背後動機。與其話係殺人鯨嘅奪命控訴，倒不如話係導演嘅控訴先真。

真相揭曉，原來Tilikum自1983年被圈養之後，被迫要學把戲先有餐食，又畀其他殺人鯨欺凌，長時間受到精神虐待。殺人事件絕非偶然，而係處心積慮嘅大報復。喺2010年慘劇發生之前，Tilikum已先後殺死另外兩人。

圈養動物（Captivity）近年一直備受爭議，主題樂園經常以「保育」做藉口，但利用圈養嘅動物帶來龐大嘅收益。事實上，被圈養嘅動物日復日要接受無謂嘅訓練，同佢哋喺大自然嘅生活完全脫節，非但之唔能夠保育，其程度上仲剝削緊佢哋。

所以當小朋友有日問起海威嘅往事時，不妨同佢講解下另一頭殺人鯨嘅遭遇，等佢哋自行理解人類同大自然，應該維持一個點樣嘅互動關係。

霸戲哥

** 博客文章文責自負,不代表本公司立場 **

串流媒體龍頭Netflix早排公佈財報，首次錄得流失訂戶，股價一度暴跌35%，一日蒸發540億美元。Netflix管理層拿拿聲急謀對策開源節流，其中一個方案就係大刀闊斧cut project。哈里王子老婆梅根（Meghan Markle）監製套動畫劇集《Pearl》首當其衝，宣佈胎死腹中。

早兩日霸戲哥都講過，Netflix實在太多動畫啦，就算每日睇一套，估計一年都睇唔完。既然梅根套嘢未開波，煞停都係好理所當然。難為哈里王子兩公婆脫離英國皇室後，成立Archewell製片公司，仲諗住磨拳擦掌製作紀錄片、動畫同兒童節目搵真銀，點知個如意算盤咁快就棘住。好在佢哋製作嘅紀錄片集《Heart of Invictus》仲有得留低，叫做有啲渣拿。

另一方面，Netflix亦考慮推出廣告plan，可以進一步調低月費，吸引訂戶回鍋。假如成事，霸戲哥預計到時成為大輸家嘅，分分鐘係YouTube，事關廣告客戶可能轉移到流瀏量更高嘅Netflix。
一場腥風血雨嘅廣告爭霸戰，肯定仲好睇過戲。