博客文章
當大家一窩蜂到楊屋道街市潮聖都已經咁興奮時，好難想像如果你喺台灣見到鄭伊健點算。伊健最近冇北上參與《大灣仔的夜》，反而留喺台灣，一度盛傳佢將客串《華燈初上》第四部定點，原來係接演另一齣懸疑推理劇《百萬人推理》。
《華燈》製作團隊百聿數碼噚日亦公佈演員陣容，除咗伊健，仲有人氣男神歌手婁峻碩、《華燈》嘅「亨利」王柏傑同「彪哥」李李仁，女主角就有霸戲哥勁like、《消失的情人節》嘅李霈瑜同《無聲》嘅新演員陳妍霏。
估計《百萬人推理》都係猜猜誰是兇手嘅燒腦劇種，伊健將聯同婁峻碩、李霈瑜偵查「網紅連續殺人事件」，然後借網絡社群嘅推波助瀾，演變成百萬人推理兇手嘅社會現象。聽落咪即係「高登神探」？
呢個幾月最開心嘅一定係李霈瑜，日日埋位前都可以黐實男神，睇發相就知佢有幾hyper啦！
霸戲哥
** 博客文章文責自負,不代表本公司立場 **
提起香港奇案，點少得跑馬地紙盒藏屍案。單係根據呢宗案件改編嘅影視作品，就已經有好幾套，好似亞視單元劇《香港奇案之血紙盒》、無綫電視電影《箱屍奇案》、三級片《紙盒藏屍之公審》，霸戲哥全部都睇過。
呢單案之所以咁令人關注，除咗因為案件本身夠晒凶殘之外，就係有太多疑點。雖然案中被告，歐陽炳強被裁定謀殺罪名成立，但好多人包括霸戲哥在內，都比較傾向相信佢係無辜，即係坐咗廿幾年冤獄。
呢單案亦係香港首宗冇殺人動機、冇人證、冇吻合指模，但單靠環境證供同科學鑒證所獲取嘅證供嚟定罪嘅謀殺案。事發為七十年代中期，警隊紀律仲未完全整頓，當中會唔會有人心急破案而「砌人生豬肉」，實在唔難夠撇除呢個可能性。
今晚11點喺J2播出嘅《逝者代言人》，就會嘗試為呢單轟動奇案「翻案」，法醫都認為死者嘅死亡時間有好大疑點。究竟真相係點？大概只有歐陽炳強本人先知。
