博客文章
TVB同芒果TV合製嘅音樂節目《聲生不息》播出後反應熱烈，適逢聽日係母親節，預計一班歌手例牌會唱出《真的愛你》同《MaMa I Love You》，呢啲歌頌母親嘅歌曲嚟應吓節。不過，盛傳今個週末所有湖南衛視嘅綜藝節目都會停播，而由於香港同湖南嗰邊係安排同日播出，為免混亂，相信都會暫停。鍾意廣東歌同《聲生不息》嘅樂迷，或者要等多一個禮拜啦。
至於點解湖南衛視突然要停播綜藝節目呢？盛傳同上個禮拜五長沙市發生嘅樓房倒塌事故有關，呢個嚴重事故最終確認有53人遇難，而湖南省委常委、長沙市委書記等官員都有出嚟鞠躬道歉。如今停播綜藝節目去尊重返逝去嘅死者，絕對係最適當同明智嘅處理方法。
湖南衛視停播綜藝節目都唔係第一次。譬如近期發生嘅嚴重空難事故，湖南衛視都有呢個決定，以示對遇難者嘅尊重。相信觀眾都會理解同明白。
霸戲哥
** 博客文章文責自負,不代表本公司立場 **
網上罪案何其多，梗係唔淨止不誠實使用電腦咁小兒科，其中一瓣，就係利用近期興起嘅加密貨幣（Cryptocurrency），進行各種犯罪活動。由於加密貨幣匿名性，交易過程亦不容易追蹤，自然成為跨國犯罪集團嘅洗黑錢工具，亦有不法分子透過加密貨幣販賣毒品、槍械，甚至係人體器官。而每一次加密貨幣嘅交易，都會增加保密性，某程度上又增加咗追查嘅難度，所以令網絡警察非常頭痕。
嚟緊有套港產電影《斷網》正正係講網上罪案。由《麥路人》班底製作，鄭保瑞監製、黃慶勳執導，霸戲哥偶像郭富城、任達華、林家棟，聯同黃德斌、賴雅妍、譚耀文同顧定軒主演，講述黑客入侵金融機構，繼而引發重大嘅網絡危機。
由於網絡世界係虛擬世界，用電影去表達虛擬世界比較抽象，鄭保瑞就諗到用美術、聲效同特技去呈現畫面，電影公司亦用咗近2000萬去打造戲入面嘅網絡森林，將虛擬同實景交疊，等觀眾有一個新嘅觀影體驗。
《斷網》暫定喺今年9月上映，大家可以睇住預告先。
