霸戲哥之日常#189 │ 伊朗式

聽到「伊朗式」呢三個字，鍾意睇戲嘅人自然會連接到金像導演Asghar Farhadi度，好似所有伊朗電影都係佢拍咁。新作《伊朗式英雄》，係Asghar繼《伊朗式分居》（2012）、《伊朗式離婚》（2013）同《伊朗式遷居》（2016）後，再次以小人物講大故事。電影上年勇奪康城影展評審團大獎，同獲得金球獎最佳非英語電影提名。

故事講述主角Rahim欠債入獄，喺假釋期間，女友Farkondeh喺街執到個裝住金幣嘅手袋，原本兩人諗住變賣還債，點知計落都唔夠還，索性搵失物主人博拎獎金。呢件「好人好事」再加上媒體嘅加鹽加醋，令Rahim意外爆紅。

套戲今個月19號先上，嚟緊喺高先電影院 Golden Scene Co. Ltd. - Film 有兩場優先場，分別係禮拜日下晝2點20分同下個禮拜二夜晚9點25分。霸戲哥啱啱裝過仲有極少量座位，想先睹為快就要把握機會啦。

霸戲哥

** 博客文章文責自負,不代表本公司立場 **

鍾意睇波嘅讀者，成日都會遇到一個難題，就係當你好想睇某場波，但唔知邊度有得播。英超、西甲、意甲呢啲，如果你畀開月費，梗係冇問題。但有啲比較偏門諸如足總盃、聯賽盃，有時真係要靠各方好友開心share，兼冒住電腦中毒嘅危險，先至有得睇。

嚟緊今個禮拜六夜晚就係英格蘭足總盃總決賽，車路士對利物浦。好彩，今次唔使臨急臨忙搵LINK嘞。因為TVB翡翠台免費有得睇，開波之前仲有個球迷派對騷暖吓場添。

利物浦今年係威係勢咁衝住「四冠王」而嚟：聯賽盃冠軍已經到手；歐聯決賽對皇馬又被睇高一線；聯賽就要博曼城餘下兩場賽事失分（相對難啲）；而今個禮拜六對車路士就自然不容有失。

車路士近況其實麻麻哋，好在領隊杜曹要求班球員加操，而周中聯賽對李斯特城又長期人多打人少，體能上可能佔優，加上車仔本身係大賽球隊，成日有捧盃命，利物浦要成為「四冠王」，真係要問過車仔先。