霸戲哥之日常#191 │ Kevin Spacey

早年捲入性侵醜聞嘅Kevin Spacey，畀荷李活封殺咗好一段時間，聽聞最近又浮番上水，喺歷史古裝片《1242 – Gateway to the West》扮演重要角色。

Kevin Spacey係人氣劇《紙牌屋》嘅靈魂人物，但霸戲哥其實一集都冇睇過。認識Kevin Spacey，係讀U嗰陣學人睇西片，發現佢嘅演技同一般明星好唔同，尤其皮笑肉不笑嗰陣，明明演好人角色（如《Pay it Forwad》），都硬係覺得有陰謀。而呢種感覺比鄭子誠更為嚴重。

亦因為咁，Kevin Spacey有份演嘅戲，霸戲哥都好少miss。好似啲得獎片《American Beauty》呀、《The Usual Suspects》同《L.A. Confidential》就唔使講，好似比較冷門嘅如《The Shipping News》、《K-Pax》同《The Life of David Gale》都lun晒，最記得當年流行買VCD，Kevin Spacey嘅戲我係成幢咁掃。

Kevin Spacey單醜聞，到今日都告唔入，會唔會有一個可能係無辜嘅呢？但即使告唔入，佢嘅損失，包括人格同金錢上，都已經冇得彌補，如果佢真係無辜嘅，就實在太可惜。霸戲哥真心覺得佢係一個難得一見嘅好演員，比起好多所謂一線明星更好戲，亦期待佢之後更多嘅演出。

大家又會唔會畀機會佢呢？

霸戲哥

** 博客文章文責自負,不代表本公司立場 **

聽到「伊朗式」呢三個字，鍾意睇戲嘅人自然會連接到金像導演Asghar Farhadi度，好似所有伊朗電影都係佢拍咁。新作《伊朗式英雄》，係Asghar繼《伊朗式分居》（2012）、《伊朗式離婚》（2013）同《伊朗式遷居》（2016）後，再次以小人物講大故事。電影上年勇奪康城影展評審團大獎，同獲得金球獎最佳非英語電影提名。

故事講述主角Rahim欠債入獄，喺假釋期間，女友Farkondeh喺街執到個裝住金幣嘅手袋，原本兩人諗住變賣還債，點知計落都唔夠還，索性搵失物主人博拎獎金。呢件「好人好事」再加上媒體嘅加鹽加醋，令Rahim意外爆紅。

套戲今個月19號先上，嚟緊喺高先電影院 Golden Scene Co. Ltd. - Film 有兩場優先場，分別係禮拜日下晝2點20分同下個禮拜二夜晚9點25分。霸戲哥啱啱裝過仲有極少量座位，想先睹為快就要把握機會啦。