博客文章
呢輪好多朋友同霸戲哥講，一定要睇 @netflixhongkong Netflix套《孟買大家姐》，原因只有一個，就係片中女主角@aliaabhatt 很正點。二話不說，即上Google同IG搜尋，並瞬間成為全球6530萬followers入面嘅其中之一。
不過，喺IG睇相的確唔及睇戲吸引，尤其電影賦予一個咁厲害嘅角色佢演，絕對加分。《孟買大家姐》根據真人真事改編，Alia Bhatt飾演印度傳奇女子Gangubai，由16歲畀男友賣落火坑，到認識黑幫變成Mafia Queen，再勝出選舉，及後向總理提出娼妓合法化，為4000名妓女謀求福利。
Alia Bhatt時而剛強不阿，巾幗不讓鬚眉；時而風情萬種，舉手投足俘虜男士芳心。呢種智慧美貌並重嘅女人，真係去到邊都橫行無忌。
據講《孟買大家姐》因題材敏感，喺印度引起好大爭議，甚至有人要求禁映。但點都好，Alia Bhatt肯定衝出印度，嚟緊喺荷李活應該大把世界。
霸戲哥
** 博客文章文責自負,不代表本公司立場 **
早兩日霸戲哥咁啱講起電影主題曲，提到《當年情》係我嘅Top 5，估唔到依家有機會畀我入戲院聽。嚟緊高先電影院將會播放三場《英雄本色 (4K修復版)》（場次與購票詳情在文尾），依家已經賣緊飛，想重溫當年情就拿拿聲買，手快有手慢冇。
霸戲哥已經數唔出睇過幾多次《英雄本色》（超過20次），但第一次睇並唔喺戲院，而係睇電視重播。記得嗰時應該讀緊小學，開始吸收唔同嘅價值觀，而《英雄本色》的確好影響到我嘅成長。
八十年代嘅電影，多數正邪分明，角色比較刻板，警察係忠，賊就係奸，唔需用腦過濾。《英雄本色》最厲害嘅地方，係一開始已講明主角狄龍同周潤發係黑社會，殺人放火乜都敢做，但觀眾唔會當佢哋係壞人不突止，相反仲會代入佢哋嘅處境，去思考同分辨善惡。
由嗰刻開始，霸戲哥已經知道，善惡嘅區分，並唔係喺職業，而係言行。警察未必一定行善，做賊亦未必一定行惡。而往往喺最危難嘅時候，能夠伸張正義嘅，先至係英雄本色。高高在上，用職權凌駕別人嘅，唔算得上英雄。
當然，《英雄本色》亦教曉我要重情重義。或者因為自己讀男校，大學又住Hall，兄弟情（唔係hehe）特別濃厚。兄弟有難，我哋會赴湯蹈火；兄弟離別，我哋會百般思念；兄弟犯錯，我哋會痛心疾首。
「今日我，與你又試肩並肩，當年情，再度添上新鲜。」黃霑嘅詞真係無敵，講中晒霸戲哥呢刻嘅心境。
