霸戲哥之日常#198 │ 英雄本色

早兩日霸戲哥咁啱講起電影主題曲，提到《當年情》係我嘅Top 5，估唔到依家有機會畀我入戲院聽。嚟緊高先電影院將會播放三場《英雄本色 (4K修復版)》（場次與購票詳情在文尾），依家已經賣緊飛，想重溫當年情就拿拿聲買，手快有手慢冇。

霸戲哥已經數唔出睇過幾多次《英雄本色》（超過20次），但第一次睇並唔喺戲院，而係睇電視重播。記得嗰時應該讀緊小學，開始吸收唔同嘅價值觀，而《英雄本色》的確好影響到我嘅成長。

八十年代嘅電影，多數正邪分明，角色比較刻板，警察係忠，賊就係奸，唔需用腦過濾。《英雄本色》最厲害嘅地方，係一開始已講明主角狄龍同周潤發係黑社會，殺人放火乜都敢做，但觀眾唔會當佢哋係壞人不突止，相反仲會代入佢哋嘅處境，去思考同分辨善惡。

由嗰刻開始，霸戲哥已經知道，善惡嘅區分，並唔係喺職業，而係言行。警察未必一定行善，做賊亦未必一定行惡。而往往喺最危難嘅時候，能夠伸張正義嘅，先至係英雄本色。高高在上，用職權凌駕別人嘅，唔算得上英雄。

當然，《英雄本色》亦教曉我要重情重義。或者因為自己讀男校，大學又住Hall，兄弟情（唔係hehe）特別濃厚。兄弟有難，我哋會赴湯蹈火；兄弟離別，我哋會百般思念；兄弟犯錯，我哋會痛心疾首。

「今日我，與你又試肩並肩，當年情，再度添上新鲜。」黃霑嘅詞真係無敵，講中晒霸戲哥呢刻嘅心境。

霸戲哥

** 博客文章文責自負,不代表本公司立場 **

霸戲哥成日覺得粵語流行曲嘅靈魂，唔係演唱者，而係曲同詞。好嘅演唱者極其量為首歌加分，但冇優美嘅曲同富有意境嘅詞，唱得再好都難以流傳後世。如要再比較曲定詞重要，我會揀詞，遺憾嘅係，咁多年嚟，填詞人嘅地位始終唔及歌手。

TVB同芒果TV炮製嘅音樂節目《聲生不息》今晚播出第四集，主題係「一生所愛」，《一生所愛》原唱者盧冠廷又點可以唔現身。由於首歌係《西遊記大結局之仙履奇緣》插曲，節目仲播出「紫霞仙子」朱茵預先錄嘅聲，算係有驚喜。

盧冠廷嘅一生所愛梗係佢老婆唐書琛，首歌正正就係由唐書琛填詞。霸戲哥每次聽到「苦海翻起愛恨，在世間難逃避命運」都好有感觸。或者呢幾年經歷太多別離吧，盧冠廷用佢嘅獨特唱腔唱呢句出嚟，特別有種說不盡嘅欷歔。

所以話，好嘅詞係幾咁重要。

霸戲哥認為「一生所愛」唔應該只係講愛情，友情、親情、甚至乎對動物嘅情感亦應該包含埋。我咁樣講，相信豬視妹都會明白嘅。