博客文章
呢輪好多朋友同霸戲哥講，一定要睇 @netflixhongkong Netflix套《孟買大家姐》，原因只有一個，就係片中女主角@aliaabhatt 很正點。二話不說，即上Google同IG搜尋，並瞬間成為全球6530萬followers入面嘅其中之一。
不過，喺IG睇相的確唔及睇戲吸引，尤其電影賦予一個咁厲害嘅角色佢演，絕對加分。《孟買大家姐》根據真人真事改編，Alia Bhatt飾演印度傳奇女子Gangubai，由16歲畀男友賣落火坑，到認識黑幫變成Mafia Queen，再勝出選舉，及後向總理提出娼妓合法化，為4000名妓女謀求福利。
Alia Bhatt時而剛強不阿，巾幗不讓鬚眉；時而風情萬種，舉手投足俘虜男士芳心。呢種智慧美貌並重嘅女人，真係去到邊都橫行無忌。
據講《孟買大家姐》因題材敏感，喺印度引起好大爭議，甚至有人要求禁映。但點都好，Alia Bhatt肯定衝出印度，嚟緊喺荷李活應該大把世界。
霸戲哥
** 博客文章文責自負,不代表本公司立場 **
提到日本藝術，好多人會諗起浮世繪，但其實有幾多人真係知浮世繪係乜？唔係講緊嗰隊樂隊呀，浮世繪係日本最具代表性嘅木板畫，源自17世紀，喺江戶時代十分盛行。「浮世」一詞嚟自佛教概念，即「現世」嘅意思，其描寫題材以民間風俗、武士、風景有關，多表現出虛幻、虛浮、歡樂無常嘅生活態度。
美人畫係浮世繪嘅最常見題材，主要描繪妓女、街頭美女咁，亦有比較偏鋒嘅題材好似以相撲為題材嘅相撲繪；以追悼名人嘅死繪；以諷刺時弊嘅風刺繪等等。但最多人認識，或者見得最多嘅，一定係葛飾北齋創作嘅神奈川沖浪裏（《冨嶽三十六景》之一）。
講咗咁耐，其實霸戲哥想介紹一項電影活動。亞洲電影大獎學院最近同MOViE MOViE合作，嚟緊喺5月20日至5月29日將會舉辦「亞洲電影巡迴放映」，而由康城影帝柳樂優彌、玉木宏同阿部寛主演嘅《北齋：浮世繪傳奇》，將會成為揭幕電影。電影講述傳奇畫師葛飾北齋嘅精采一生，同埋點樣喺人生下半場創作出名留千古嘅《富嶽三十六景》。
亞洲電影巡迴放映仲有其他電影放映，包括台灣純愛電影《一杯熱奶茶的等待》；韓國新導演金世仁執導嘅《相近不相親》；關錦鵬經典作品《地下情》（修復版）等等，電影發燒友點可以錯過。
