會哭因為太幸福

人有七情六慾，開心會笑，傷心會喊，好似係人之常情。不過大家又有無諗過其實眼淚係種奢侈品？

荷蘭應用科學研究中心2011年發表過一份報告，指出人類失控痛哭都有文化差異。一個地區愈發達，民眾愈常哭泣。澳洲同美國男性比起其他地區更愛哭，尼日利亞同保加利亞等地男性最少流淚；瑞典女士超敏感，尼泊爾同埋加納女性表現冷酷得多。

研究員當年結論係，哭泣其實係唔係一個悲慘嘅標誌，反而係一種「特權」。發達地區民眾可以因為工作碰釘流淚，落後國家嘅人卻因為戰爭、貧窮同埋社會不公等原因，練成鐵石心腸。報告慨嘆終日飽受飢荒同埋戰爭逼害嘅人，通常較易明白哭哭鬧鬧不能解決問題。

近年敍利亞局勢立立亂，世界糧食計劃署特別喺約旦設立分部應對危機，由聯合國特使Dorte Jessen出任部長。Dorte過去十幾年都喺北非同埋中東等地處理難民問題，見過無數對眼睛因為苦難而再流不出一滴淚。佢喺一節備忘中寫道：

「2011年非洲索馬利亞半島大飢荒，我身在肯雅達達阿布難民營中，見到一位母親同兩個幼童領取緊急糧食。母親動作非常利落，一手扯開其中一個袋遞向孩子。其間母子間不發一言，臉上無任何表情，似乎早就慣咗呢種生活方式，已經麻木。當人筋疲力竭嘅時候，情緒已經變成一種奢侈品，沒有一絲多餘氣力喊。」

活在幸福國度嘅人較易喊得出。地球上仲有好多好多地方，尚有好多好多人，日子艱困得連激動嘅氣力都無。膠仔希望大家曉得珍惜動容時刻，感謝傷你嘅人帶來保護你嘅人，更重要係守護一啲核心價值，踢走逼害同埋不公義，以免社會愈變愈差。

希望你我臉上，都係幸福感動嘅淚痕。

資料來源：
1）荷蘭應用科學研究中心2011年報告：Culture and Crying
2）Science of Us：Tears Are a Luxury Item

神州快訊

** 博客文章文責自負,不代表本公司立場 **

最近人機圍棋大戰成為全球熱話，唔少人都關注人工智能未來有咩可能性，圍棋玩法同埋發展亦再次成為討論焦點。膠仔同大家講講圍棋究竟係乜嘢。

圍棋係一種策略性棋類，用格狀棋盤同埋黑白二色棋子對弈，主要目的係鬥搶得多地盤，以所圍「地」嘅大小決勝負。雖然玩法好簡單，但係變化無窮無盡，可以話係最難掌握嘅棋類。

棋局過程主要分為布局、中盤及收官三部分。布局階段主要講求規劃大局，為之後攻防埋下伏筆，呢個時候一般都係搶佔角位，效率較棋盤中央「中腹」位置高。中盤即係雙方攻守，考驗攻守、死活、大局觀等多方面。最後收官階段，即係地盤及死活已經大致確定後競逐邊界。

圍棋喺中國古代已經出現，相傳堯帝認為阿仔丹朱生性頑劣，發明圍棋以閑其情。三國時期魏、吳亦盛行圍棋，吳國人更會記低棋局作研究，所以棋局記錄又可以稱為吳圖。唐朝又出現「棋待詔」官職，著名棋手王積薪所作「圍棋十訣」，現代圍棋依舊適用。

圍棋之後東傳到南韓同埋日本，經過一段時間演化而有唔同規則。喺19至20世紀，因為中國受外國入侵同埋內戰等歷史原因，圍棋喺日本反而更盛行，要到近年中國先再逐漸追近，甚至重新超越日韓。

圍棋喺中國文化中佔有重要地位，同《易經》中嘅陰陽理論演化而來。已故「昭和棋聖」吳清源曾經指出，21世紀圍棋必然講究陰陽調和，透過對弈，人可以領略圓滿調和嘅「道」，充實棋局以外嘅人生。