霸戲哥之日常#204 │ 缺德醫生

Netflix最近有套紀錄片《我們的父親：缺德醫生》上架，霸戲哥仲同豬視妹講笑，話個醫生係咪成日問候人老母咁缺德。點知一開嚟睇，頭幾分鐘已單刀直入，交代個醫生原來用自己嘅精子放入婦女體內，technically做咗好多人嘅老竇。

外國真係無奇不有。

個缺德醫生叫Donald Cline，早喺1979年已經開始進行人工授孕手術，絕對係呢方面嘅權威。全盛時期嘅佢，的確幫過無數婦女成功懷孕，問題有好多冇經女方同意，就靜雞雞擺自己啲精入去。又會咁兒戲嘅。

先唔講道德問題，淨係諗起自己有成竇兄弟姊妹，而你個親生老竇係住喺隔籬條街嘅時候，諗落都真係幾恐怖同難以接受。睇完紀錄片先知，當地法例規定捐精者嘅精子最多只可以用3次，阿Donald就肯定違規無誤。

最離奇地方係，成單案Donald最後被吊銷牌照（但其實佢早就退咗休），緩刑一年同埋罰咗500蚊美金咁大把。而佢本尊今日仍然喺印第安納州風流快活，聽聞仲有好多佢嘅支持者添。

想知道更多關於呢單奇聞，不妨花少少時間睇咗齣紀錄片。

霸戲哥

** 博客文章文責自負,不代表本公司立場 **

尋那個他真的很興奮。由方東昇主持嘅TVB節目《尋人記II》今晚播出，首集主角、人稱「元祖級投訴王」嘅安仔登場。以往尋人主角，都係由方東昇率領黃曉瑩、李曉欣同黃靖婷捐窿捐罅摑出嚟，今次安仔反客為主自動送上門。

投訴王安仔唔係浪得虛名，自詡「元朗特首梁安國」，三十多年來一直與政府各部門交涉，例必鍥而不捨咁投訴到滿意為止，好多高官都買佢怕。節目入面，方東昇同佢落一轉街市，有檔主夾道歡迎半賣半送，有檔主當佢鬼見愁避之則吉。一個咁爭議性嘅人，究竟投訴係為咗自肥？抑或為咗公義？節目冇下定論，看倌自行判斷。

香港係公認嘅「投訴之都」，少少事都投訴一餐，但其實好多投訴個案唔係為咗公義，唔係為咗啖氣，而只不過係「搵着數」。就以送外賣為例，大把西客以「倒瀉湯」為由投訴，其實只係想賺coupon，或者呃免費餐食。

但點解一個城市會有咁多投訴？又點解投訴人往往都攞到着數？呢個反而係霸戲哥最想知。

《尋人記II》逢星期四、五晚上10點半喺翡翠台播出。