以為保險系數幾高「雙辣招」，竟然愈炒愈烈，張局長滴晒汗下終於過關。走開政治Beat的記者眉精眼企，背後邊黨邊派想攞咩嘢，都打聽到七七八八，本來政治嘅嘢點會冇幕後交易，今次「辣招」事件，邊個選擇離場，邊個選擇留在議事廳投咗咩票，都會數清楚，呢個明顯睇到背後的計算。
雙料(行會及立會)議員林健鋒投票時竟然不在議事廳，不少記者喺社交網討論區同行家間的WhatsApps群組中質疑身為行會成員，點解可以走佬唔投票？！特首委任立法會議員入去做行會，其中一個目的都係想去箍代表黨派在立法會的票架啦，記者齊齊話記得以前行政會議成員就算遊說唔到黨友支持政府的法案，自己幾唔同意，都要在立法會投支持票架。
之前都有報道話過，雙料林議員有份去問張局長攞口頭承諾，但就說服唔到黨友支持政府，反而張局長讓步俾咗口頭承諾建制派, 又被泛民鬧爆，記者圍埋傾計時都覺得張局長在立法會上果句：「吹皺一池春水。」佢多多少少都有啲抱怨信錯人。
泛民亦笑經民聯又食又拎，經民聯主席梁君彥就同林議員劃清界線，強調「經民聯從來無叫過林健鋒去（見局長），只是他自己覺得有意見要去反映」。他又指，經民聯從未說過會支持今次草案，並反駁外界指經民聯「又食又拎」，強調「我們無嘢食，亦無嘢拎，只是忠實反映意見，叫政府把刀唔可以亂切」。林議員的黨友石禮謙指林食早餐食滯咗，肚瀉去唔到投票。
咁關鍵時候肚痾，又真係信佢好還是唔信佢好呢？
Ariel
** 博客文章文責自負,不代表本公司立場 **
壓抑樓市的「雙辣招」凶險中過關，有口痕友話最後結果30對12票(反對加棄權)通過，票數都唔算好緊呀，凶險咩嘢？
政壇高人就話真係幾凶險，呢個壓抑樓價措施，民調做出嚟大多數市民支持，泛民好難投反對票，但泛民同CY政府的關係，大家都知有幾好，又唔想支持CY呢項重大政策，最後找到「有法不依」的理由，都可以講得過去，就有玩吓嘢的空間。聽聞泛民出身的張局長一直同泛民有溝通，評估佢哋係會離席，但幾時走，就好難估。
泛民拉隊離場走人，就會出現另一個問題，到時夠唔夠法定開會人數，要全體議員一半即係投票時要有35人或以上在座，你知尊貴的建制派議員中，好多都貴人事忙，坐定定開會都唔容易，加上呢次條例草案，商界有反彈，借吓尿道，走咁十個八個都唔奇，到時泛民約20人又走晒的話，咁出現流會的機會就好大。
下星期三預算案，再下星期三北京開人大政協兩會，好多建制派議員就上京，一流會形勢就會好混亂。所以如果唔速戰速決，一來對市場可能造成不明朗，二來到時投票形勢就七國咁亂。所以昨晚政府大叫告急，應該係驚流會多個驚唔夠票通過。
到最後條數係計到剛剛好，經民聯同自由黨唔坐定定喺議事廳就會流會，如果泛民唔離場又不支持的話，亦會過唔到，高人分析其實凶險就係任何一方出現差池，只要有一方玩到盡就出事，仲認為換咗以前的政府可能寧願讓大啲步，等保險系數高啲先去馬。
咁呢次算唔算賭盤大細，同議員晒冷呢？高人就唔覺得係。反而覺得大家都未算玩到盡，或者係未敢玩盡，泛民去到最後一刻講咗都算數，只係估唔到佢哋幾時離場啫，係就係玩，但未算玩到盡；至於經民聯有份攞咗局長口頭承諾，但一票都冇支持，政府內部實有睇法架喇，但亦唔會怪佢哋到盡，始終多數都坐晒喺度免流會(雙料林議員例外，借啲二走咗冇留喺議事廳投票)，總之各黨各派都係想攞到盡，最後就未算玩到盡。
至於點解今日搞得掂，冇再拖落去，高人就分析，拖落去其實對各方都冇好處，政府固然唔想拖到三月北京兩會開會都未搞掂，到時開會人數都唔夠，但今次吊詭在於，反對辣招的建制派員大部分都會上去北京開會，到時再審議投票，到泛民頭痕，坐喺議事廳，唔想投支持但又唔想草案過唔到，如果離席，建制派議員又分分鐘鐘唔夠法定人數，到時流會就會怪離場抗議的泛民，而且再拖落去，搞到市民煩厭，都係死。估計係咁，所以最後大家都想速戰速決。
