壓抑樓市的「雙辣招」凶險中過關，有口痕友話最後結果30對12票(反對加棄權)通過，票數都唔算好緊呀，凶險咩嘢？
政壇高人就話真係幾凶險，呢個壓抑樓價措施，民調做出嚟大多數市民支持，泛民好難投反對票，但泛民同CY政府的關係，大家都知有幾好，又唔想支持CY呢項重大政策，最後找到「有法不依」的理由，都可以講得過去，就有玩吓嘢的空間。聽聞泛民出身的張局長一直同泛民有溝通，評估佢哋係會離席，但幾時走，就好難估。
泛民拉隊離場走人，就會出現另一個問題，到時夠唔夠法定開會人數，要全體議員一半即係投票時要有35人或以上在座，你知尊貴的建制派議員中，好多都貴人事忙，坐定定開會都唔容易，加上呢次條例草案，商界有反彈，借吓尿道，走咁十個八個都唔奇，到時泛民約20人又走晒的話，咁出現流會的機會就好大。
下星期三預算案，再下星期三北京開人大政協兩會，好多建制派議員就上京，一流會形勢就會好混亂。所以如果唔速戰速決，一來對市場可能造成不明朗，二來到時投票形勢就七國咁亂。所以昨晚政府大叫告急，應該係驚流會多個驚唔夠票通過。
到最後條數係計到剛剛好，經民聯同自由黨唔坐定定喺議事廳就會流會，如果泛民唔離場又不支持的話，亦會過唔到，高人分析其實凶險就係任何一方出現差池，只要有一方玩到盡就出事，仲認為換咗以前的政府可能寧願讓大啲步，等保險系數高啲先去馬。
咁呢次算唔算賭盤大細，同議員晒冷呢？高人就唔覺得係。反而覺得大家都未算玩到盡，或者係未敢玩盡，泛民去到最後一刻講咗都算數，只係估唔到佢哋幾時離場啫，係就係玩，但未算玩到盡；至於經民聯有份攞咗局長口頭承諾，但一票都冇支持，政府內部實有睇法架喇，但亦唔會怪佢哋到盡，始終多數都坐晒喺度免流會(雙料林議員例外，借啲二走咗冇留喺議事廳投票)，總之各黨各派都係想攞到盡，最後就未算玩到盡。
至於點解今日搞得掂，冇再拖落去，高人就分析，拖落去其實對各方都冇好處，政府固然唔想拖到三月北京兩會開會都未搞掂，到時開會人數都唔夠，但今次吊詭在於，反對辣招的建制派員大部分都會上去北京開會，到時再審議投票，到泛民頭痕，坐喺議事廳，唔想投支持但又唔想草案過唔到，如果離席，建制派議員又分分鐘鐘唔夠法定人數，到時流會就會怪離場抗議的泛民，而且再拖落去，搞到市民煩厭，都係死。估計係咁，所以最後大家都想速戰速決。
Ariel
** 博客文章文責自負,不代表本公司立場 **
呢排內地政圈風起雲湧，石油幫同四川幫幾乎全部中箭下馬，連帶幾位核心人物的外圍關連人物都開始出事，好似剛剛突然被撤銷全國政協資格的內地美女富豪劉迎霞，就曾經喺中石油的肥膏中切到少少出嚟食，就係咁食少少，已經令佢成為中國十大女富豪。
劉美人一度被內地傳媒捧為最美全國政協委員，1972年出世，曾經當過兵，但身世就像謎一樣。
據接觸過佢的朋友話，劉美人同人話佢出身軍人家庭，隨著九十年代的改革浪潮乘勢而起，由於佢本身有啲背景，加上真係靚女一名，談吐又得體，冧掂各級官員，傳聞一直搭到上去一名前政治局常委，更通過不同系統同中石油集團拉上關係。
見過呢位劉美人的人士稱，出席過多次佢搞的飯局，同場有各類京城大官的大、小秘書，甚至到政治局委員級別的秘書們，都會俾面。劉美人出手闊綽，兩三個人的飯局都要包間十二人大枱的房間，鮑蔘翅肚燕窩，唔貴唔叫，而且仲會大送名牌。
劉美人出身少講，連佢的婚姻同戀情都好神神秘，據聞佢好細個時結過婚有一個女，但隨住身家上漲，呢啲年少婚姻都維持唔到。之後以劉美人咁好條件，好易搭上官商名流，佢曾經與一名京城領導人的秘書拍拖，強調自己唔係小三，話行埋時對方係單身，而且係講心唔講權。但做得高官秘書要識美女話咁易，最後佢頂唔順大秘書太花心，加上已經搵到咁上下，兩人就分開，結束「唔係小三」生涯。劉美人近年包養咗個後生過佢好多、又冇錢又冇權的靚仔。
佢被撤銷政協資格的消息都幾罕見，因為一般只會係涉嫌違紀違法被正式調查的人先會被撤銷資格，但劉美人一直未聞涉及出咩事，睇吓今次離奇事件背後，好快又會抽出一啲大人物囉。
