呢排內地政圈風起雲湧，石油幫同四川幫幾乎全部中箭下馬，連帶幾位核心人物的外圍關連人物都開始出事，好似剛剛突然被撤銷全國政協資格的內地美女富豪劉迎霞，就曾經喺中石油的肥膏中切到少少出嚟食，就係咁食少少，已經令佢成為中國十大女富豪。
劉美人一度被內地傳媒捧為最美全國政協委員，1972年出世，曾經當過兵，但身世就像謎一樣。
據接觸過佢的朋友話，劉美人同人話佢出身軍人家庭，隨著九十年代的改革浪潮乘勢而起，由於佢本身有啲背景，加上真係靚女一名，談吐又得體，冧掂各級官員，傳聞一直搭到上去一名前政治局常委，更通過不同系統同中石油集團拉上關係。
見過呢位劉美人的人士稱，出席過多次佢搞的飯局，同場有各類京城大官的大、小秘書，甚至到政治局委員級別的秘書們，都會俾面。劉美人出手闊綽，兩三個人的飯局都要包間十二人大枱的房間，鮑蔘翅肚燕窩，唔貴唔叫，而且仲會大送名牌。
劉美人出身少講，連佢的婚姻同戀情都好神神秘，據聞佢好細個時結過婚有一個女，但隨住身家上漲，呢啲年少婚姻都維持唔到。之後以劉美人咁好條件，好易搭上官商名流，佢曾經與一名京城領導人的秘書拍拖，強調自己唔係小三，話行埋時對方係單身，而且係講心唔講權。但做得高官秘書要識美女話咁易，最後佢頂唔順大秘書太花心，加上已經搵到咁上下，兩人就分開，結束「唔係小三」生涯。劉美人近年包養咗個後生過佢好多、又冇錢又冇權的靚仔。
佢被撤銷政協資格的消息都幾罕見，因為一般只會係涉嫌違紀違法被正式調查的人先會被撤銷資格，但劉美人一直未聞涉及出咩事，睇吓今次離奇事件背後，好快又會抽出一啲大人物囉。
Ariel
** 博客文章文責自負,不代表本公司立場 **
《明報》事態發展一如我們早前所料，出現一個硬鬥硬的局面，管理層不會在員工壓力下停止找大馬人鍾天祥來港，而員工亦會繼續抗爭，搞工會是唯一出路。結果《明報》真是委任鍾天祥出任首席執行總編輯，而員工果然宣布籌組工會。
《明報》工會由7名《明報》員工發起，打正旗號為捍衞言論及新聞自由。《明報》工會籌委會話，鍾天祥將於下月就任首席執行總編輯，他們將爭取與管理層簽署約章，確保編輯部編採自主，爭取總編輯須符合關注組提出四大訴求，包括捍衞言論自由、獲得管理層信任、獲得編輯部同事信任，以及熟悉香港情況。
一般工會以爭取工人薪酬等權益做主打，但《明報》工會就以捍衛報紙自由立場為旗號。搞工會如同捉棋，有攻必有防，《明報》工會以「明報報業」這間公司為主體，係一個好聰明的做法，即係只有報紙員工才可參加，因為管理層在《明報週刊》、《亞洲週刊》和印刷公司都有較多支持者，但這幾個部門都另有公司，以「明報報業」作主體，其他公司的員工都不能加入，防止了管理層派"細作"入會搶奪工會主權。
《明報》管理層對員工搞工會十分頭痛，因為早兩年《明報》加拿大多倫多版搞工會，和當地管理層鬧翻天，結果打埋官司，所以一提到「工會」兩隻字，大老闆張曉卿都唔多高興。不過香港不同外國，香港工會沒有集體談判權，即係話管理層無責任同工會談判，聞說明報管理層深明此點，計劃利用此點，不打算和工會對話，不接受工會代表員工談判的地位。
雖說《明報》管理層可以冷待工會，但事情鬧到這個地步，老闆和夥記變成僵局，又真係好難收科。
