《明報》工會攻防戰

《明報》事態發展一如我們早前所料，出現一個硬鬥硬的局面，管理層不會在員工壓力下停止找大馬人鍾天祥來港，而員工亦會繼續抗爭，搞工會是唯一出路。結果《明報》真是委任鍾天祥出任首席執行總編輯，而員工果然宣布籌組工會。

《明報》工會由7名《明報》員工發起，打正旗號為捍衞言論及新聞自由。《明報》工會籌委會話，鍾天祥將於下月就任首席執行總編輯，他們將爭取與管理層簽署約章，確保編輯部編採自主，爭取總編輯須符合關注組提出四大訴求，包括捍衞言論自由、獲得管理層信任、獲得編輯部同事信任，以及熟悉香港情況。

一般工會以爭取工人薪酬等權益做主打，但《明報》工會就以捍衛報紙自由立場為旗號。搞工會如同捉棋，有攻必有防，《明報》工會以「明報報業」這間公司為主體，係一個好聰明的做法，即係只有報紙員工才可參加，因為管理層在《明報週刊》、《亞洲週刊》和印刷公司都有較多支持者，但這幾個部門都另有公司，以「明報報業」作主體，其他公司的員工都不能加入，防止了管理層派"細作"入會搶奪工會主權。

《明報》管理層對員工搞工會十分頭痛，因為早兩年《明報》加拿大多倫多版搞工會，和當地管理層鬧翻天，結果打埋官司，所以一提到「工會」兩隻字，大老闆張曉卿都唔多高興。不過香港不同外國，香港工會沒有集體談判權，即係話管理層無責任同工會談判，聞說明報管理層深明此點，計劃利用此點，不打算和工會對話，不接受工會代表員工談判的地位。

雖說《明報》管理層可以冷待工會，但事情鬧到這個地步，老闆和夥記變成僵局，又真係好難收科。

Ariel

** 博客文章文責自負,不代表本公司立場 **

傳媒行業真係忙到飛起，剛出席完續牌證會的無記又鬧出風波。

話說在高登討論區，有網民PO相，指無記買的一套台灣旅遊節目中，將主持人原聲國語係講「台灣國旗」，原裝字幕都係寫「台灣  國旗」但無記出的字幕改為「台灣  區旗」，網民質疑無綫政治審查。

圖片來源：高登討論區

節目喺無綫J2台周一晚播出，叫「冒險王」，有網民就批評無記的做法。

上次冬奧香港選手接受訪問事件，區旗變港英旗就係俾人改圖，呢單就唔係喇。無記急急去查，發現真係衰咗，話有工作人員譯字幕時改咗，出街前檢查亦有問題，但就話唔係政治審查，仲出份聲明澄清：

「本台對外購節目之翻譯／字幕均有嚴格要求，並不一定是直譯原文，而是會因應內容及本地慣常用語及認知，恰當地作出翻譯及提供字幕。

有關節目《冒險王》，經了解後，確實有個別工作人員出錯，絕不存在政治審查，本台會修改有關字幕，並會檢討工作流程。」

兩間免費電視台面臨續牌的議題，節目質素自然成為焦點，依家啲觀眾咁眼利，睇嚟無記都要打醒十分精神囉。