霸戲哥之日常#210 │ She-Hulk

呢個世界已經冇任何力量去阻止MCU不斷擴大。繼月光騎士之後，最新加盟嘅超級英雄就係女版Hulk，aka She-Hulk。佢將會喺Marvel Studios原創劇《變形女俠：律政英雄》亮相，日前發佈咗第一輯預告片，並會喺8月17日於Disney+獨家上線。

根據Marvel年鑑，She-Hulk最初出現喺1980年嘅《The Savage She-Hulk》，主角Jennifer Walters係一名律師，因為一次意外要緊急輸血，而接受咗表哥Bruce Banner嘅血液，因而獲得Hulk嘅突變能力，成為She-Hulk。

《變形女俠：律政英雄》由艾美視后Tatiana Maslany飾演Jennifer，睇番條預告片，Jennifer變成She-Hulk之後，只係膚色變咗綠色，身形變化唔算大，仲保留咗女性美態添。但亦因為咁，搞到好多Marvel粉絲極之不滿。

最搞笑係，好多網民嘲笑She-Hulk不倫不類，成隻《史力加》入面嘅費安娜金主咁（都係綠色，不用分得那麼細），有人索性將trailer換咗費安娜金主入去，居然完全冇違和感。

不過預告未係final version嘅，即管睇吓餘下呢3個月，會唔會執返靚仔先出街啦。

霸戲哥

** 博客文章文責自負,不代表本公司立場 **

大家有冇發現，每當一齣電影或劇集，劇情失控到冇辦法自圓其說嘅時候，編劇總會出動鎩手鐧——就係愛呀。愛可以穿越時空；愛可以化解仇恨；愛可以拯救宇宙；愛可以跨越生死。

憑着愛，我信有出路。

今集《聲生不息》嘅主題，繼續係「一生所愛」，而成晚嘅焦點，就落咗喺葉蒨文唱出嘅《憑着愛》身上。

盧冠廷作曲、潘源良填詞嘅《憑着愛》，係電影《群龍戲鳳》嘅主題曲。原唱係蘇芮，但之後有好多唔同版本，阿Lam林子祥都翻唱過。

至於Sally今晚唱出呢個版本，就夾雜咗阿Lam嘅激昂同Sally嘅柔情，感覺煥然一新。而呢首歌背後更加有洋蔥，原來Sally係為亡母而唱，難怪份外有感覺。

聽到有啲掛住霸戲媽添。