博客文章
終於嚟到英超煞科，今晚11點，霸戲哥同豬視妹乜都唔做，正係啄住部電視（同埋手機）睇英超。
往年英超未到煞科，冠軍隊通常提早捧盃，但今季曼城同利物浦居然由頭鬥到落尾，真係罕見。據資料顯示，今季英超煞科係歷來最刺激嘅一屆，因為今晚幾乎每場球賽，都會影響球隊嘅命運。
先講爭標組，曼城暫時領先利物浦1分，只要贏阿士東維拉就蟬聯錦標。維拉雖然冇嘢爭，但領隊謝拉特、球隊主力古天奴同丹尼京斯都係前利物浦球員，只要令曼城失分，佢哋母會利物浦就好大機會封王（唔係贏唔到狼隊啩）。
霸戲哥捧熱刺，梗係睇諾域治對熱刺呢場，除咗睇下孫興文會唔會拎到最佳神射手，成為亞洲第一人之外，只要唔輸畀榜尾嘅諾域治，下季就可以重返歐聯。同埋睇住宿敵阿仙奴就算贏到愛華頓，下季都只能踢歐霸係爽嘅（笑）。
與此同時，曼聯同韋斯咸都爭緊歐霸盃席位，而般尼同列斯聯就兩隊只能活一隊。
所以呢，霸戲哥預咗今晚手機會係咁響架啦。
霸戲哥
** 博客文章文責自負,不代表本公司立場 **
終於抵受唔住坊間一致嘅好評，特登請假入場睇《奇異女俠玩救宇宙》。呢輪伏戲霸戲哥睇唔少，原先都抱住獵奇心態降低個期望值，睇完先知好評非曲兼冇伏。霸戲哥夠膽講，呢套戲將會成為後世講完又講嘅超級cult片。
導演Dan Kwan同Daniel Scheinert個腦唔知咩構造，說故事方式完全唔跟章法，可以話完全冇路捉，前半段劇情如過山車的大暴走，觀眾只有死跟份兒。你以為成齣戲就以胡鬧方式推到完場，中段就以親情倫理角度入手，慢慢拉觀眾返番去有邏輯嘅時空。到尾段又忽然嚟個哲學學術研討，探討起虛無主義、存在主義⋯⋯結局係最出人意表，導演竟然可以將前面失晒控嘅劇情嚟個無縫銜接，仲要完全解得通，霸戲哥真心大服。
演員方面，楊紫瓊放下明星包袱演大媽冇得輸，演員嘅多樣性本身就好切合多元宇宙嘅命題，呢個Evelyn可以話係為楊紫瓊度身訂造。下屆奧斯卡唔該預留一個影后提名畀佢。聽聞原本係諗住搵成龍拍嘅，只可以話，好在呢個時空係楊紫瓊拍嘅啫（笑)。
寫寫下又想入場睇多次添。
