霸戲哥之日常#212 │ 漩渦

豬視妹見悶悶地，話想睇番齣恐怖片嚟自虐一下。咁啱喺Netflix見到有齣《漩渦》，霸戲哥即時諗起伊藤潤二套經典漫畫，雖然明知冇關，但都決定click入去睇。

套戲全名其實係《漩渦：恐懼鬥室新遊戲》，亦即《恐懼鬥室》系列分拆出嚟嘅外傳戲。霸戲哥唔係《恐懼鬥室》fans，但都知呢套嚴格嚟講算係第九集，唔知有冇機會破我哋《陰陽路》嘅紀錄呢？

《漩渦》雖有Chris Rock同Samuel Jackson孭飛，不過爛蕃茄評分只係得37%，上年上畫時都幾無聲無息。呢集依然有「I want to play a game」，但Jigsaw其實冇出現，負責殺人嘅變態佬只係模仿Jigsaw犯案。故事講警探Chris Rock多年前因為舉報同袍濫用私刑，而遭到警局上下排擠，某日伙拍新丁調查一宗地鐵撞死人案件，發現死者原來係警察兼好友，犯案手法更十足十Jigsaw。隨住劇情推進，班警察逐個逐個被殺，連Chris Rock老竇Samuel Jackson都成為嫌疑犯……

套戲故事結構都算完整，探討嘅社會公義問題亦值得反思。可惜嘅係，《恐懼鬥室》系列最精采嘅部份梗係啲死亡遊戲設計，呢集嘅設計血腥有餘，緊張程度欠奉，而final boss亦唔算太難估。

不過見到豬視妹睇到定晒神，呢套算勉強收貨啦。

霸戲哥

** 博客文章文責自負,不代表本公司立場 **

子華神套「賀歲片」《飯戲攻心》落實喺今年中秋上映，而今日佢又為另一套電影《毒舌大狀》 舉行開鏡拜神儀式。吳煒倫身兼導演同編劇，演員有黃子華、謝君豪、王敏德、Dee哥何啟華、《梅艷芳》姊妹花王丹妮、廖子妤等等，林保怡同谷德昭仲會友情客串。

故事係關於一宗國際名模涉嫌虐待女兒嘅案件，最後演變成法律界、權貴同名媛之間嘅對決。子華神扮演法官同大狀，就咁睇戲名，毒舌嗰個相信都會係佢。22年前子華喺《男親女愛》都只係扮師爺，今次有機會做大狀，仲唔攞番夠彩？

據吳煒倫形容，套戲係講一個衰人，即係子華啦，大戰一班上流社會嘅人渣。唔知呢班人渣有冇嚟自法律界嘅呢？因為霸戲哥都識唔少，好想睇吓呢班人有咩下場。呵呵。