霸戲哥之日常#216 │ Hello Kitty

有睇開霸戲台嘅讀者都知，霸戲哥同豬視妹不時留意陸永主持嘅J2節目《逝者代言人》，可能本身多少有啲病態啦，對「雨夜屠夫」、「紙盒藏屍」呢類奇案特別好奇。

原來今晚已經去到最後一集，內容居然係講霸戲哥覺得最恐怖同噁心嘅「Hello Kitty藏屍案」！大佬真係要留番最後先打⋯⋯

好記得案發當年，霸戲哥考完A-Level冇耐，成日流連尖沙咀加連威老道，點會知道嗰度發生咗單咁轟動嘅碎屍加烹屍案⋯⋯又點會知道有人癲到會將頭骨塞入隻Hello Kitty入面⋯⋯

當時嘅報章其實都好癲，將庭上審訊過程繪形繪聲咁用文字同圖像表達，包括虐打死者經過、餵吃屎尿情形、同碎屍烹屍過程，真係一世都記得。

更癲嘅係，圍繞呢單案有好多解釋唔到嘅靈異事件（自行維基），種種跡象都好似係死者冤魂不息嘅表現⋯⋯

最癲嘅係，涉案三名被告最終被判誤殺罪成，其中兩人被判終身監禁（首宗誤殺判終身監禁），而其中一個上訴得直改判18年，同已經放咗出嚟⋯⋯

Anyway，大家有興趣知多啲呢單案，不妨留意今晚11點播出嘅《逝者代言人》，又或者買本翁靜晶嘅《危險人物II》嚟睇。

霸戲哥

** 博客文章文責自負,不代表本公司立場 **

TVB同芒果TV合力製作嘅音樂節目《聲生不息》，前後播出咗五集，坊間反應同收視都出奇地好，TVB食住個勢，宣佈6月5號開始，《聲生不息》會延長多半粒鐘，由夜晚8點半一直做到10點半。

對於呢個改動，豬視妹梗係最開心。之前幾集因為霸戲哥要睇英超，佢迫於無奈要喺手機睇，都已經有啲微言。依家英超踢完，豬視妹順理成章霸住部電視睇番夠本。

霸戲哥之前都講過，《聲生不息》同一般TVB製作確實有幾大分野，始終芒果TV製作呢類綜藝節目有經驗，有一條收視方程式，其他配套又好，只要嘉賓跟住劇本做，節目自然會有一定娛樂性同話題性。舉個例，大家依然會記得李玫唱《天若有情》唱到跪喺地；曾比特同阿Lam唱《單車》嘅互動；Sally用《憑着愛》悼念亡母等等。

亦因為咁，觀眾睇《聲生不息》唔淨止聽廣東歌，亦會欣賞佢嘅舞台效果，甚至乎感受參賽嘉賓嘅付出同情感，呢啲觀賞感覺係《流行經典50年》畀唔到你。

霸戲哥其實都支持《聲生不息》延長嘅。