霸戲哥之日常#221 │ 血紅維尼

早兩日霸戲哥先寫完《救難小英雄》，入面經典卡通角色甩頭甩骨，童年回憶大崩壞。大家若嫌唔夠重口味，嚟緊一定要留意呢部《Winnie the Pooh: Blood and Honey》。

就咁睇戲名，你梗係以為又一齣合家歡嘅小熊維尼電影，又點會諗到呢個blood原來咁血腥。

套戲故事都好cult，話Christopher Robin要上大學，賴低咗維尼同豬仔冇人照顧，由於生活太過艱難，維尼同豬仔回歸獸性，變得凶殘暴戾。其中有幕，有位美女享受緊按摩浴，維尼同豬仔潛伏美女身後，用哥羅芳將佢迷魂，再拖佢去公路開車將對方輾死。大佬，呢啲咩狗屎橋段嚟架⋯⋯

據講套戲淨係拍咗10日，依家做緊後期，好明顯都係low budget片格局，即係少少血腥、少少怪雞同少少香艷。

你會問，惡搞套咁嘅片，真係過到迪士尼嗰關？又原來A. A. Milne喺1925年創作嘅小熊維尼，喺2022年1月1號開始已經公有化（只限原版），但跳跳虎就仲未有牌權。

又長知識啦。

霸戲哥

** 博客文章文責自負,不代表本公司立場 **

終於嚟到今個球季嘅終極一戰，喺香港時間凌晨三點將會上映歐聯決賽——利物浦對皇家馬德里。霸戲哥一諗到又要過一輪冇波睇嘅日子，今晚捱眼瞓都要頂埋佢，賽馬會戶口都唔該生性同我頂埋佢。

呢個歐聯戲碼，四年前已經上演過。最記得利物浦門將卡利奧斯踢咗成季好波，臨到決賽先嚟派膠，仲一場派夠兩粒，拱手相讓個獎盃畀皇馬，自己嘅前途都毀埋，認真陰公。至於當年一倒掛一遠程炮射死利記嘅巴利，今日仲喺皇馬陣中，雖然已淪為大後備。

講到最觸目，一定係利記前鋒沙拿嘅武士復仇戰。四年前畀對手沙治奧拉莫斯強行掹到甩臼傷出，今次仲唔有仇必報？

霸戲哥就私心想皇馬贏，話晒佢晉級過程夠晒傳奇，幾乎場場都係反勝對手。不過點都好，最緊要場波好睇！