霸戲哥之日常#225 │ 鴛鴦戲水

TVB播完馬德鐘套《雙生陌生人》，今晚推出由譚俊彥同陳山聰孭飛嘅《十八年後的終極告白 2.0》（《十八年後2.0》），坊間盛傳《十八年後》係臨危受命，用嚟同ViuTV套《冥冥之中》打對台云云。又有兩台收視對戰，絕對係電視迷如豬視妹之福。

《十八年後2.0》係續集，但故事劇情、角色同前集係完全冇關。霸戲哥對個劇集名有啲保留，就咁加個2.0真係好咩？故事同樣係由一宗離奇命案貫穿，而劇中每位重要角色，都有殺人嘅嫌疑，而佢哋之間當然有千絲萬縷嘅恩怨同埋不可告人嘅過去，留待之後慢慢揭曉。

第一集主要係鋪排角色，譚俊彥飾演性格型畫家，就註定潦倒無誤。佢老婆譚凱琪就係交際花，負責幫老公接job，即凝住會派綠帽嗰type。至於譚俊彥老友陳山聰，開畫廊大把錢，又有個靚老婆趙希洛，明顯係人生勝利組。今集仲有四眼look嘅龔嘉欣，似乎同譚俊彥係舊相識。

仲以為呢類燒腦劇第一集實有人死，但竟然冇，死嘅只不過係譚凱琪養嘅哥基BoBo。不過大家最期待嘅出浴畫面就梗唔少得，譚俊彥同譚凱琪上演一幕鴛鴦戲水，算係有啲睇頭啦。

霸戲哥

** 博客文章文責自負,不代表本公司立場 **

如果有一日你一覺瞓醒，發覺自己原來昏睡咗20年，你會有咩反應？斷估唔係殺人犯假釋出獄嘅感覺，而係多少似古人穿越未來嘅格格不入。

呢20年變化太大，科技嘅進步，改變晒人與人之間嘅距離，昔日嘅潮流文化、道德標準同價值觀都重新確立，要一時間去消化同接受真係唔易。

依家喺Netflix上架嘅校園電影《高中無限期》，就係用咗呢個有趣setting，女主角Stephanie喺一次啦啦隊表演時發生嚴重意外，昏迷咗20年，醒返時除咗發現自己青春不再，更難以接受自己墮入社交媒體嘅泥沼。

套戲講中晒呢兩代年輕人嘅思想轉變，從前一代只想喺學校出風頭，浮誇而直率。 呢代鍾意經營社交媒體，含蓄但虛浮。兩種唔同嘅生存模式，冇話有絕對嘅對錯，但畀霸戲哥揀，一定想返番去以前。

值得留意係Rebel Wilson嘅大癲大廢演出，保證令你開懷大笑。