霸戲哥之日常#230 │ 香港小姐面試

以前因工作關係，每年一度嘅香港小姐面試（第一round）都係盛事，因為老細相信，亦事實證明，面試比起整個選舉過程，甚至邊個贏冠軍，更有討論價值。原因係乜大家心裏有數，香港人就係咁，睇人＿＿最開心。

今日終於等到香港小姐第一輪面試，可謂「精銳盡出」，佳麗靚相亦無懸念嚟個網絡大洗版。聽聞今年候選港姐將會去日本拍外景，難怪下至中環灣仔、中至油尖旺深水埗、上至上水沙頭角嘅靚女都嚟碰吓運氣。但真心想知，究竟哪裏來的自信，驅使佢哋參選港姐？

以往每逢呢啲日子，霸戲哥都會被安排一項神聖任務，就係幫佳麗改名同寫句caption。咁其實改名都大有學問，最原始而又最懶嘅改名方式，就係將佳麗link去熟識嘅女星度，譬如「xx版xx」，但霸戲哥認為冇乜創意唔太鍾意，只有技窮又走投無路時先會咁改；高階啲嘅係將佳麗嘅個人資料好似來自邊度、職業、特徵等融入花名，變相多一層資訊；再進階嘅就係玩埋食字，將一樣完全無關嘅事物link入佳麗嘅特徵，既搶眼又令人容易記住佢哋個名。

成日有人問霸戲哥， 會唔會技癢幫佳麗改下名，我都話咪搞啦。尤其見到近年選港姐好似變咗另類博出位途徑，同埋見到啲另類佳麗畀閃光燈閃到老尷個樣，認真都有少少難堪。

不過又咁講，冇咗呢班另類佳麗，又邊有咁大嘅宣傳效果？

霸戲哥

** 博客文章文責自負,不代表本公司立場 **

無意中喺 Netflix睇到個遊戲節目叫《不熔有失》（Floor is Lava）， 一睇幾乎睇到唔捨得熄機。霸戲哥真係有眼不識泰山，呢個號稱最受歡迎遊戲節目，早喺2020年已經推出，而第二季亦即將喺今個星期五上架。

遊戲極之簡單，每集設有一個主題關卡，一team三人嘅參賽者，要通過重重障礙，一時要飛檐走壁，一時要引體上升，目標係要避免跌落溶岩而抵達出口，咁就可以拎到可觀獎金。簡單講，成個遊戲考驗參賽者嘅膽色、智力、體力，同埋最重要嘅合作性。如果身邊有個豬隊友，保證會「陀衰家」。

節目嘅setting超班，參賽者嘅反應同表情更加係世界級。睇住佢哋臨門一腳跌落熔岩嘅慘樣，有時真係忍唔住要幸災樂禍。

睇《不熔有失》，令霸戲哥諗番起以前《閃電傳真機》嘅遊戲環節「一石二鳥三蟲四duck」。細細個真係好恨報名，可惜最終因為怕畀同學仔笑而放棄。呢度有冇人參加過可以分享吓？

快啲到禮拜五，我要一口氣煲晒第二季。