霸戲哥之日常#233 │ 村校

霸戲哥係港島人，入屯門嘅次數就已經唔多，至於再入嘅下白泥，人生就只去過一次咁大把。最記得事前先book定酒店（嘉湖海逸好似係），直情當正去程trip咁大陣仗。

偶然去轉下白泥睇日落梗係浪漫，但如果你日日對住個泥灘、彈塗魚同招潮蟹，又係咪真係咁過癮？

今晚呢集《尋人記II》，方東昇決定搜尋90年代喺下白泥讀村校嘅一班小豆丁，當年佢哋通山走天生天養，平日落田種菜，閒時捉蝦釣魚為樂，書本知識唔多，但夾竹桃有冇毒，黃蜂蜜蜂點分，肯定考佢哋唔到。

村校係舊時代產物，多建於窮鄉僻壤，教育資源唔多，但的確令好多鄉村細路有得讀書嘅機會。90年代開始，新界新市鎮迅速發展，鄉村亦逐漸走向都市化，村校慢慢被淘汰。加上出生率下降，適齡學童年年滅少，好多村校都難逃殺校命運。

方東昇今次搵番嘅呢班豆丁，今日都已經四十出頭做晒父母。問佢哋有得揀，會唔會畀下一代讀村校，雖然各有爭辯，但答案其實都心中有數。

喺香港，求學始終都係求分數。呢個呃唔到人嘅。

霸戲哥

** 博客文章文責自負,不代表本公司立場 **

端午節快樂，大家食咗糭未？近年端午好似少咗啲節日氣氛，唯獨濕濕立立嘅天氣一啲都冇變，真係熱到成隻裏蒸糭咁。

少咗節日氣氛，或多或少都同冇咗龍舟競渡有關。因為新冠肺炎疫情，龍舟競渡已經停辦咗兩年，今年原本有望復辦，點知第五波疫情打亂晒部署，依家要順延到10月先搞。今日喺赤柱有象徵式嘅龍舟巡遊睇，叫做吊住下癮先。

霸戲哥讀U嗰陣，因為住嘅宿舍歷年都有份幫赤柱龍舟做helper，因而獲得一次參賽資格。好記得嗰時成班Kong U仔，劣起衫袖騷晒手瓜，又牙斬斬咁分享作戰策略，又話龍尾要搵個大肥仔壓船之類。結果我哋呢班打壞書生，淨係撐出起點都已經用咗一半氣力，到比賽頭50米已經chur到乾塘，差啲撐唔返到岸。旁邊明顯有操開嘅龍舟大叔，個個睇到笑而不語。

冇得睇龍舟競渡，惟有睇陳詠燊套《逆流大叔》先啦，Now爆谷自選台有得睇。