博客文章
大爺雞好細個嗰陣跌親跛跛要做手術，豬視妹提議不如順便做埋絕育。就係咁，大爺雞一覺醒來，就發現自己冇咗蛋蛋。冇咗蛋蛋，最多都係乸雞啲啫，如果冇埋JJ，究竟又會點呢？小便又去唔去到呢？
嚟緊就有套電影《弊傢伙，JJ唔見咗》，主角朝早起身突然唔見咗JJ，醫生都束手無策。為咗尋根，佢參加咗個神秘組織「奔州集會」，先發現天下覓J不獨佢一人。尋根同尋人一樣，都有黃金時間，因為離開肉身嘅JJ只能存活6天。
橋段係咪好黐線呢？因為套戲係《屍殺片場》導演上田慎一郎拍嘅，仲要係構思咗10年添，梗係創意滿分啦。
《弊傢伙，JJ唔見咗》今個月23號上映，一齊見證一段瘋狂尋J之旅。
霸戲哥
** 博客文章文責自負,不代表本公司立場 **
問下大家，你哋食辛辣杯麵嗰陣，會唔會飲埋入面啲湯？霸戲哥唔食得辣，但對住明知係味精粉沖出嚟嘅湯，都係毫無抵抗力地飲個佢杯底朝天。
連杯麵嘅湯都咁講究，你就知韓國人對湯嘅要求有幾嚴格。如果中國人食飯，最緊要雙筷子，咁韓國人就一定係隻匙羹。韓國人係無湯不歡，大部份料理都以湯做主打，「湯之國」係當之無愧。
據講，韓國湯品嘅種類分得好廣，大致可分為guk、tang、jjigae同jeongol四大類，如果要細分，就肯定超過100種！
Netflix依家就有套關於韓國湯之文化嘅節目《湯之國》上架，節目會介紹各種唔同種類嘅湯品，好似有濟洲島聞名嘅海鮮湯，又有大邱嘅牛骨湯，睇完包你食指大動。
至於點解韓國人咁重視湯品文化？原來韓國以前因為成日戰亂，普遍百姓都好窮，為咗可以平均分配食物，家家戶戶都習慣煲一大煲湯，保證人人有份。呢種一家人嘅感覺，就流傳後世到依家，成為韓國嘅傳統文化。
冇咩事，我隊埋個辛辣杯麵先。
