霸戲哥之日常#241 │ Celine Dion

呢生人買飛入場睇得最多嘅戲，肯定係《鐵達尼號》。我發誓並唔係為咗睇Kate Winslet粒⋯⋯海洋之心，亦當然唔會為咗睇Leonardo DiCaprio啦。講你都唔信，霸戲哥居然係想聽《My Heart Will Go On》，後來索性買咗隻電影soundtrack返屋企日聽夜聽，搞到老媽子一度懷疑我鬼上身。

直至有一日，霸戲哥終於頂唔順Celine Dion不停消費呢首歌，把心一塊將CD送埋畀人，首歌嘅魔咒先至解除。但依家每提起Celine Dion，都會想打冷震。當然，呢個只係霸戲哥問題，因為Celine Dion貴為樂壇天后，無論佢唱幾多次《My Heart Will Go On》，全球fans依舊會起哄。

不過對於Celine Dion嘅認識，說來慚愧，霸戲哥真係唔太知。而以Celine Dion嘅生平為藍本嘅電影《聲夢戀歌》，後日就會上映，故事會講述主角「艾蓮」由被發掘到成名，再成為三子之母嘅經歷。當然，觀眾梗係會再喺戲院度聽到佢嘅首本名曲啦。

我又打冷震啦喂。

霸戲哥

** 博客文章文責自負,不代表本公司立場 **

噚晚播出嗰集《東‧南歐潮什麼》，梁芷珮 Christy Leung 帶觀眾快閃波黑同黑山，繼續感受異國風情。波黑，即波斯尼亞黑塞哥維那，喺克羅地亞隔離，係巴爾幹半島西部嘅一個多山國家。港人最熟識嘅一定係首都薩拉熱窩（Sarajevo），多得當年Sammi首《薩拉熱窩的羅密歐與茱麗葉》唱到街知巷聞。

呢首由鬼才林振強填詞嘅歌，係根據真人真事填寫，90年代薩拉熱窩經歷內戰，呢對「青春小情人」，一個係塞爾維亞裔，一個係波斯尼亞穆斯林，正正係兩軍對壘嘅陣營。兩人準備逃離薩拉熱窩之際，結果雙雙中槍倒地，挽臂找艷陽去了。嗚嗚。

薩拉熱窩個名詩意到無倫，但亦有個別號叫「歐洲火藥庫」，因為佢經歷過第一同第二次世界大戰，同埋之前提及嘅波黑內戰梁芷珮。所以噚晚梁芷珮帶觀眾參觀市中心，唔少建築物牆身都仲有一個個子彈窿，呢啲戰火嘅痕跡，係時刻提醒居民戰爭嘅可怕。

雖然係咁，波黑始終係人傑地靈，戰火過後經濟極速復蘇，今日薩拉熱窩已經成為旅遊熱點。