霸戲哥之日常#248｜ 熱血籃球

因為MJ，霸戲哥自細就超鍾意打籃球，但礙於生得矮，打極都去唔到滿意嘅水平。讀完U之後基本上都冇乜點掂過個籃波。

打得唔叻就放棄，說穿了，就係我根本未夠熱愛籃球。

最近Netflix就有套關於籃球嘅電影《籃兒當搏盡》（戲名娘到喊）。講述Adam Sandler飾演嘅球探Stan，夢想成為NBA教練，可惜一路都畀人當係二打六，撈極都撈唔掂。直至佢喺西班牙街場見到Bo（Juancho Hernangómez飾），被對方嘅球技震懾，決心將佢訓練成NBA球星，當然中途遇到好多挫敗啦。好一個籃球版《少林足球》嘅橋。

電影行公式化嘅套路，預咗冇乜大驚喜，但當你見到Stan同Bo各算追尋夢想而付出血汗，讀書時嗰陣熱血當堂返番晒嚟。戲入面亦有數之不盡嘅NBA球星，現役同過氣嘅都有，NBA迷一定睇到好high。

仲諗住落街轉身射個三分波，點知遇着黃雨。算啦，都係下次先。

霸戲哥

** 博客文章文責自負,不代表本公司立場 **

35年前，《秋天的童話》橫空面世，豆丁如我未知情為何物，後來翻睇先知發哥同紅姑呢段似有還無嘅情緣，有幾咁令人揪心。

好嘅電影唔一定要happy ending，留有遺憾嘅故事，有時更加經得起時間考驗。

適逢電影上映35周年，下月喺高先電影院將會上映《秋天的童話》修復版，屆時仲有導演張婉婷出席分享會添。

講起張婉婷導演，佢同拍檔羅啟銳喺影壇有「雌雄大導」美譽，霸戲哥最鍾意唔係《秋天的童話》，亦唔係《歲月神偷》，而係《玻璃之城》，呢套亦永遠係我最愛電影嘅top 10。

唔知《玻璃之城》第日有冇機會喺高先電影院放映呢？