Micheal Wong黃偉綸上星期尾做新聞處處長last day，剛好遇上辣招法案在立法會打大交，佢在新聞處最後的歲月仍然要做，在立法會踎足四天，剛真應驗咗戰鬥到最後一分鐘囉。
Micheal Wong呢個星期三走馬上任海事處處長，佢離開新聞處之前，特首CY特登同一班人請Micheal Wong食一餐飯，仲要特首私人出錢唔係出公數，以答謝Micheal Wong在新聞處打併之功。聞說餐飯在馬會食自助餐，十幾人由7點幾食到10點，CY唔係求其食飯，而係用咗心，梁太亦有加入，搞到Micheal Wong都有啲感動，畢竟夥記調職，做老闆者都唔係事必要咁大陣仗送行，肯咁送行，都係出咗心兼俾足面個，都算有情有義咯。
而家啲政治搞到咁激，新聞處自然係一個熱廚房，斷估海事處的熱度都無咁高啦。記得上次海事處由政務官出掌，都要數到90年代初許堅信的年代，當時搞緊97過渡，有不少同海事有關的事情要上中英聯合聯絡小組傾，要搵政務官在海事處搞好後勤。今次又搵Micheal Wong呢類政務官去海事處，都係要搞搞上次十一海難的後遺症，推動一下改革。
官場八卦友話，Micheal Wong做埋呢轉處長，只要搞得好好睇睇，都好大機會撈番個常任秘書長做吓，估佢性格都會開行車加油去啦。
Ariel
** 博客文章文責自負,不代表本公司立場 **
以為保險系數幾高「雙辣招」，竟然愈炒愈烈，張局長滴晒汗下終於過關。走開政治Beat的記者眉精眼企，背後邊黨邊派想攞咩嘢，都打聽到七七八八，本來政治嘅嘢點會冇幕後交易，今次「辣招」事件，邊個選擇離場，邊個選擇留在議事廳投咗咩票，都會數清楚，呢個明顯睇到背後的計算。
雙料(行會及立會)議員林健鋒投票時竟然不在議事廳，不少記者喺社交網討論區同行家間的WhatsApps群組中質疑身為行會成員，點解可以走佬唔投票？！特首委任立法會議員入去做行會，其中一個目的都係想去箍代表黨派在立法會的票架啦，記者齊齊話記得以前行政會議成員就算遊說唔到黨友支持政府的法案，自己幾唔同意，都要在立法會投支持票架。
之前都有報道話過，雙料林議員有份去問張局長攞口頭承諾，但就說服唔到黨友支持政府，反而張局長讓步俾咗口頭承諾建制派, 又被泛民鬧爆，記者圍埋傾計時都覺得張局長在立法會上果句：「吹皺一池春水。」佢多多少少都有啲抱怨信錯人。
泛民亦笑經民聯又食又拎，經民聯主席梁君彥就同林議員劃清界線，強調「經民聯從來無叫過林健鋒去（見局長），只是他自己覺得有意見要去反映」。他又指，經民聯從未說過會支持今次草案，並反駁外界指經民聯「又食又拎」，強調「我們無嘢食，亦無嘢拎，只是忠實反映意見，叫政府把刀唔可以亂切」。林議員的黨友石禮謙指林食早餐食滯咗，肚瀉去唔到投票。
咁關鍵時候肚痾，又真係信佢好還是唔信佢好呢？
