霸戲哥之日常#255｜ 日本足球

《足球小將》喺好多人心目中，包括霸戲哥，地位係無可取代。佢盛載住幾代人嘅足球夢，日本隊今日能夠擠身列強，我認為唔係因為J-League搞得好，係因為日本人流住戴志偉同小志強嘅熱血。

問題係，《足球小將》已經係40年前嘅產物，正常戴志偉都應該變阿伯要掛靴啦，有乜理由仲未踢世界盃？加上現代足球同40年前嘅都改革過好幾次，以前崇尚個人主義重進攻，依家講求整體戰術重防守。得罪講，《足球小將》真係out out哋。

霸戲哥無意中喺Disney+搵到套動畫叫《青之蘆葦》，故事圍繞日本青年足球，主角青井葦人並唔係踢前鋒，而係踢左閘，仲有超強嘅閱讀球賽能力，能助攻助守同跑不完嘅體力。呢個設定明顯就係為現代足球而設。

漫畫作者小林有吾希望透過動畫帶出重要訊息，就係想踢好足球，一定要盡快放棄學業，將所有時間投入訓練。你見依家啲日本球星，細細個已經去海外學法，好似南野拓實同柴崎岳咁。

香港足球其實都可以參考一下。

霸戲哥

** 博客文章文責自負,不代表本公司立場 **

早兩日霸戲哥叫大家睇《Seaspiracy》，其中有講到漁民瘋狂屠殺鯊魚嘅畫面，一條條冇咗魚旗嘅鯊魚陳屍海邊，慘無人道。唔好問啲魚旗去晒邊啦香港人，知你哋威威啦魚翅撈飯。

人類總要為佢哋嘅凶殘付出代價，現實世界未必做到，至少喺電影世界度血債血償。

下月有套新嘅鯊魚「災難片」《鯊餌》（Shark Bait）上映，故事講一班狂妄年輕人渡假，原本好哋哋喺沙灘隊吓啤傾吓偈咪算，無啦啦偷人架水上電單車出海玩，結果發現自己被困喺海中心，畀一群鯊魚包圍。可預計成套戲嘅劇情，不外乎畀鯊魚瘋狂追咬到血肉欉飛，跟住人類又會諗計仔對付番啲鯊魚（無限loop）。輸賭邊個係下一個遇害者，成為電影嘅一大樂趣，總算幫鯊魚出番啖氣。

呢類B級片通常都有唔少香艷鏡頭，今次負責派福利嘅就係英國女星Holly Earl，算做有啲睇頭咁啦。