博客文章
豬視妹成日話霸戲哥唔飲水，耐唔耐就隊個杯埋嚟要我「杯杯清」，搞到頻頻去夜尿，一度懷疑自己腎虧。其實，讀過AL Biology嘅應該都知，「一日要飲八杯水」呢個絕對係謬誤，只係唔知點先說服到豬視妹啫。
估唔到今晚TVB播出新節目《健康100錯》，第一集就還咗霸戲哥一個公道！節目由馮盈盈同周奕瑋主持，佢哋先搵100個random素人（來自不同性別、年齡層）做測試，問佢哋覺得「一日要飲八杯水」啱定錯，再搵專家嚟講解。一日要飲幾多水，其實要視乎好多因素，包括你嘅性別、年齡、體重同水量流失情況咁，唔一定要飲八杯，亦唔係飲得多就好，因為飲得多，你個腎都未必負荷得到。
寫到有啲口乾，仲諗住去雪櫃拎罐可樂之際，就見到豬視妹隊杯水埋嚟……惟有乾咗佢啦。
霸戲哥
** 博客文章文責自負,不代表本公司立場 **
利申，此文無意褻瀆任何宗教，如覺得被冒犯，霸戲哥先喺度講聲唔好意思。
霸戲哥自細已經係「問題兒童」，乜都鍾意問一餐，對宗教又特別好奇，搞到身邊人以為我想信教。而我最唔明嘅係，明明久唔久就有報道講啲邪教異端點呃人，點解仲有咁多人中個頭埋去？
Netflix近日有套紀錄片《聽話的孩子：邪教的禱告與服從》（Keep Sweet: Pray and Obey），就係講早年轟動一時嘅摩門教異端FLDS（Fundamentalist Church of Jesus Christ of Latter-Day Saints）嘅醜聞，教派領袖Warren Jeffs因被控性侵兒童而被判處終身監禁再加20年。
呢個FLDS，主張一夫多妻制，其中一條教條係「妻子越多、孩子越多，就可以上更高層嘅天堂」，遵循教條嘅信徒深信不疑。教派領袖Warren Jeffs又會扮成先知，不停向信徒灌輸理念，等佢哋更容易支配同就範。
之前喺Netflix睇嗰套《我們的父親：缺德醫生》，個醫生用自己精子嚟做人工受孕已經好變態，估唔到呢個Warren Jeffs仲仆街，借宗教為名歛財同性侵，行為令人髮止。據講佢嘅老婆有78個（24個名未成年），生嘅細路至少60個。
你估佢死後會上幾多層天堂呢？
