霸戲哥之日常#259｜ 尋親記

話說《尋人記II》播出之後，霸戲哥已經先後撞過兩次元朗特首梁安國（都係大埔），同一次N無男孩徐志文（柴灣），證明呢個香港其實幾咁細。

但香港細唔代表尋人易，亦咪以為方東昇真係咁神通廣大，其實每次成功尋人嘅背後，中間夾雜住無數次失敗同嘗試。而今集節目仲要嚟個五星級任務——徐志文主動提出想尋找從未見過面嘅生母。

由一張破爛嘅出世紙開始，到去佢出世嘅醫院打聽，再意外搵到志文媽媽嘅泰國地址，到最終搵紅十字會出手，可惜到呢刻仍然未有消息。

霸戲哥同豬視妹都好關心呢段「尋親記」，但同時間亦好擔心見到兩個可能性：志文生母不在人世； 志文生母唔想認番個仔。喂，乜咁似《阿飛正傳》嘅。

不過又咁講，人生就係不斷嘅尋尋覓覓。有時結果未必係最重要，能夠喺過程入面嚐到甜酸苦辣，先至最珍貴。

霸戲哥

** 博客文章文責自負,不代表本公司立場 **

大家最近扭開電視，有冇發現一堆莫名其妙嘅廣告，冇乜Voice Over，冇乜資訊，只知道係同J2、620有關，唔講仲以為係蘋果廣告製作公司拍嘅，定還是又係都市傳說之類。

再細心諗，你會發現廣告入面最重要同唯一嘅資訊，咪就係J2同620囉，而J2個logo以新形態出現，即係話喺620呢日，J2將會重新啟動，相信會有更多新節目登場。

仲有就係，TVB不嬲啲宣傳片都係四平八穩冇乜新意，呢次玩到咁破格，似乎想摵甩TVB嗰陣娘味。睇嚟C君呢個創意總監都有啲偈仔。

霸戲哥一向都好buy呢類放棄傳統嘅宣傳手法，效果work唔work都好，唔肯踏出呢步，成功嘅機會永遠係零。

好彩霸戲哥以前上司都係開明嘅人，有器度容許我任意莽為，到呢刻我仍然好感激佢嘅包容同知遇。