霸戲哥之日常#257｜ 魷魚騷

有冇人同霸戲哥一樣，開始練習緊猜包剪揼同一二三紅綠燈？

Netflix啱啱宣佈即將製作《魷魚遊戲》真人騷節目，全球招幕456位參賽者，一齊困喺大禁室玩兒時遊戲。唔同嘅係，今鋪輸咗唔使死，最多都係得個桔啫，贏就獨吞456萬美金獎金，足以改變命運，簡直係窮L如我嘅福音。暫時未知有幾多款遊戲同玩乜（梗係去到先知啦）， 但霸戲哥練定包剪揼都應該冇死。

參加方法好簡單（文尾有LINK），只要填FORM（即係剔剔剔），上載近照同埋一條一分鐘短片略略介紹自己，就有機會被選中入GAME。據聞下年年初開始拍攝，霸戲哥已經plan好有四個禮拜唔喺香港，嘿嘿。

Netflix早前公佈季度財報，全球訂戶流失20萬，累到股價狂瀉。經濟拮据下，班管理層諗埋啲縮數，cut咗啲無謂project，唔搞咁多動畫，都只係治標唔治本。但今次科水炮製話題性嘅《魷魚遊戲》真人騷，似乎行番啱正軌嘞，始終有好節目先留得住訂戶嘛。話唔定股價又反彈呢！

其實，最識玩《魷魚遊戲》嘅，咪就係Netflix班管理層囉。

霸戲哥

** 博客文章文責自負,不代表本公司立場 **

大家有冇玩過街機嘅Photohunt？記得當年成班friend圍喺部遊戲機前找錯處篤篤篤，幾蚊雞玩成個晏晝，諗番起都爽。

點估到第日出嚟做嘢，Photohunt居然成為職業技能，尤其喺轟動一時嘅淫照事件上大派用場。其次就係用喺搵劇集嘅穿崩位。

不過就算霸戲哥幾眼利，點都唔及全能高登仔皮毛，好多丁屎嘅錯處，都逃唔過佢哋嘅法眼。

我甚至懷疑係電視台特登放出嚟做逆向宣傳。

近期熱播嘅《十八年後的終極告白2.0》，都一樣有穿崩位畀網民捉到。話說前兩晚嗰集陳山聰聲稱同老婆趙希洛一齊去芬蘭睇極光，仲懶勁咁擺低兩張機票喺枱面。鏡頭一閃而過，兩張機標雖然有佢哋個名，但到達時間竟然唔一樣， 說好的一齊去呢？

套劇自從上星期譚凱琪墮樓身亡之後，個個角色都有嫌疑，引起全城競猜誰是兇手。所以又唔怪得網民會金晴火眼，連半秒閃過嘅數目字都唔放過啦。