霸戲哥之日常#264｜ 監獄瘋雲

幾日前睇完Elsa Pataky套奇片《終極攔截戰》，唔爭在睇埋佢老公Chris Hemsworth套《蜘蛛頭監獄》，話晒係近期紅爆嘅 《壯志凌雲：獨行俠》個導演Joseph Kosinski拍，呢次衰極有個譜啦。

電影根據短片小說改編，講述蜘蛛頭監獄係一個特殊監獄，犯人可以喺範圍內彈出彈入，放風吹水打機打枱波都冇問題，但就要強制被迫試藥。

坐監都有咁優厚待遇，聽落係咪好荀先？啲新藥係由雷神Chris飾演嘅科學家研發，當中有催情、釀鬱同服從，被落藥嘅犯人個個鬼上身咁不受控制。班犯起初畀催情藥搞到爽YY，後來見識過釀鬱嘅威力，先知白老鼠一啲都唔易做。

套戲嘅setting其實唔錯，有啲《Black Mirror》feel，雷神做瘋狂科學家亦算癲得勻循。美中不足係個story telling技巧好一般，好多情緒起伏位都係蜻蜓點水式帶過，明明套戲可以探討更多關於罪惡感、救贖、自由意志同藥物操控嘅範疇，肯定可以拍得更deep。

另一點亦可以肯定，雷神兩公婆應該cap咗Netflix唔少錢。

霸戲哥

** 博客文章文責自負,不代表本公司立場 **

我諗大家一定有玩過Overcooked？四個廚師迫埋喺個狹窄廚房度，一個切菜一個洗碗一個拎碟一個執食材，趕頭趕命為苛刻客人上菜， 最後因為豬隊友唔記得熄爐而搞到廚房着火。

打機都已經咁混亂，現實嘅廚房唔使講，就更加似打仗。霸戲哥自問不是呢個料，入廚房嘅粗重嘢留番畀豬視妹。但心底裏，其實我係好鍾意睇人煮嘢食。所以，當知道全新一輯《鐵人料理：傳奇爭霸戰》喺Netflix上架，都特登撳咗個提醒掣。

今輯《鐵人料理》全部都係大師級，成功打敗鐵人嘅參賽者，可以進入決賽再較高下，爭奪象徵「傳奇鐵人」嘅金廚刀。一如以往，每集都有一個主題嘅烹飪舞台，霸戲哥睇嗰集要煮羊肉，一舊舊羊肉掛晒喺度畀班大廚任揀，都咪話唔爽。香港就好難怕咁大規模啦，無謂陣間畀觀眾投訴話浪費食物啦。

成個節目睇得最開心都係豬視妹，佢睇見班廚師用林林總總嘅高科技廚具，對眼發晒光咁滯。睇還睇，咪諗住又添廚具呀，邊有咁大個廚房啫。