博客文章
依家J2有個「呢鋪開乜」系列，每晚開唔同範疇，涉獵一啲較冷門嘅題材，滿足年輕一代嘅好奇心。而霸戲哥比較關注逢禮拜二晚播出、由洪永城、涂毓麟、黃嘉雯主持嘅《開腦》。
近年有個被嚴重濫用嘅詞彙叫「腦洞大開」，《開腦》相信係打開你個腦洞嘅意思，節目講解高科技商機，包括上年曾經好hit嘅元宇宙概念。
霸戲哥覺得呢個節目好蝦人拍，因為大家對元宇宙嘅熱衷程度，就同Bitcoin嘅價格一樣極之浮動。其中最難掌握嘅就係，啲資訊夠唔夠update。
仲記得上年年尾，每次有朋友聚會，傾傾吓話題都會轉移咗去NFT度，個個摸住杯底講到唉聲歎氣，輪流哭訴邊隻NFT賺得最少。今日又點呢？我勸大家提都咪提囉。
霸戲哥最期待嘅係，究竟節目會灌輸一個點樣嘅心態同價值觀，去面對勢將降臨嘅web3.0時代呢？
霸戲哥
** 博客文章文責自負,不代表本公司立場 **
潮流興重啟。J2重啟，D2（Diablo2）又重啟，連家庭都可以重啟。
最近Disney+有套家庭真人騷《家庭重啟記》（Family Reboot）上架，內容係講一啲面臨問題嘅家庭，放低晒手頭上工作，透過五日嘅旅程，重新建立同修補關係。聽落好適合某某去參加噃。
第一季總共六集，每集輕輕鬆鬆半個鐘，睇完幾有得着。霸戲哥睇咗第一集，個家人因為各有各忙，彼此嘅關係變得冷淡，溝通變得例行公事。為咗重啟關係，佢哋被安排去咗沙漠地區，入面了無人煙，建築物都唔見有，直情好似去咗《賭俠大戰拉斯維加斯》入面嘅沙漠咁，響尾蛇隨時仲多過人。
喺咁偏僻嘅地區，呢家人通過玩一啲兒時玩意，好似波波池、套圈圈同掟水彈咁，慢慢建立起默契，原來原始遊戲一樣可以玩得好開心，重點在於三個字——一家人。
大家都嘗試放低手上工作，同家人消磨一下時光，或者會有新嘅得着。
