霸戲哥之日常#278｜ 無聊極致

因為Mr. Bean，霸戲哥居然一口氣煲晒成套Netflix劇。佢套《人蜂不兩立》雖然斬開九集，但當去到每集尾聲時，就算你幾眼瞓，身體都好似唔受控制咁煲埋去，直至意識到第二朝原來要早起時先心知不妙。

能夠深宵戇狗狗睇戇豆而自豪嘅，肯定唔止霸戲哥一個。好似又要湊仔、又要開壇講股嘅唐牛，咪一樣咁無聊。

霸戲哥鍾意咗Mr. Bean大大話話都超過半個世紀，每年聖誕都例行公事要翻睇「Mr. Bean過聖誕」，保守估計至少睇過30次。奇在佢嘅笑料幾十年來千篇一律，無論係《戇豆先生》抑或《特務戇J》，堆砌嘅笑料都不外乎剝光豬、打爛嘢、鹹濕嘢同炒車，但觀眾咁多年嚟都照單全收。

今次呢套《人蜂不兩立》，就係講佢幫人看屋（to be precise係豪宅），因為畀一隻蜜蜂滋騷，搞到燒咗人間屋。其實劇情真係超級無聊，但Mr. Bean就係有呢個魔力，你明知佢會破壞所有嘢先收手，但個心總係想睇吓佢點撞板，然後擺出一個不在乎嘅戇狗狗樣。

Netflix成日畀人話冇好嘢好睇，不如搵Mr. Bean拍多幾齣呢類戲，保證可以留得住我哋呢班無聊觀眾。

霸戲哥

** 博客文章文責自負,不代表本公司立場 **

豬視妹曾經問過我，細個夢想做咩職業？記得霸戲哥當時係咁答：做乜都冇所謂，唔做律師就得。正所謂前世做乞衣，今世做律師。

係嘅，甚至到呢一刻，霸戲哥對呢個職業仍然充滿偏見，雖然身邊的確有唔少正義之士，但亦有太多斯文敗類同衣冠禽獸。「維護正義」，向來都係讀law嘅人冠冕堂皇嘅旗幟，去合理化佢哋剝削社會資源嘅惡行。

亦因為咁，耐唔耐就有啲律政劇出籠，唔係因為題材特別吸引，純粹係幫呢個充滿銅臭嘅爛職業洗白（我話嘅）。

不過最近有套台劇叫《正義的算法》喺Disney+上架，引起咗我嘅注意。陳柏霖扮演typical唯利是圖嘅猾滑律師，開口埋口為客人利益着想；郭雪芙就係捍衞公義嘅律政新人，為咗正義有時會好心做壞事。一正一邪互補長短，的確有啲火花。最正嘅位係，關機算盡如陳柏霖者，都開始被郭雪芙嘅儤勁而同化，慢慢重拾番讀law時嘅初衷。

究竟正義點計算？點先算係真正義？呢啲問題，唔應該由我哋呢啲普羅百姓去答，而係嗰班掌管住法律、權力同財力嘅人去演算。