霸戲哥之日常#281｜ J2監察站(8)：繩縛

原諒霸戲哥就係咁膚淺，一見到人玩繩縛，第一時間會諗起AV情節，同凝住附近有條皮鞭同蠟燭，心諗個女仔好眉好貌做乜玩到咁刁咁變態。

有呢種世俗眼光，除咗因為衰鹹濕之外，主要係因為狹隘嘅見識令我哋產生偏見。但互聯網嘅普及，見識少已經再唔係藉口，你想知嘅事基本上都Google到。我哋嘅孤陋寡聞。

繩縛，日文「縛り」（shibari），源於日本古代武士用嘅捕繩術，後來歌舞伎加入咗呢個元素，慢慢演變成一種藝術。繩縛藝術有唔同風格，當然都有AV常見嘅BDSM（Bondage, Displine, Sadism & Masochism）；有為攝影而設嘅追求視覺美感；亦有係為宣洩情緒嘅吊綁。

今晚J2播出嘅《喂喂喂 你話你係邊個邊個》，故事主人翁就係繩縛藝術師Rika，佢會分享點解由一名OL，突然決心到日本學藝，再搖身變成繩縛師嘅心路歷程。

或者大家睇完節目，以後唔使再用淫邪眼光去看待繩縛呢門藝術。

霸戲哥

** 博客文章文責自負,不代表本公司立場 **

之前霸戲哥推介過律政劇《正義的算法》，大家有冇追先？陳柏霖同郭雪芙呢對鬥氣冤家又幾討好，現實中佢哋原來一樣成日鬥氣。

陳柏霖主持嘅真人騷節目《極島森林》，最新一集就請咗郭雪芙做嘉賓，上咗阿里山國家公園紮營，而佢哋嘅任務就係聯同樹木醫生一齊拯救山上嘅櫻花樹。今次終於唔使見到郭雪芙個公仔麵頭同近視眼鏡，當堂變番靚女。以往嘉賓好似劉冠廷同謝欣穎咁，喺鏡頭前都會扮吓幫手，唯獨郭雪芙完全翹埋雙手等陳柏霖表演，又幾真性情喎。

阿里山位於嘉義縣東部，一年四季景色都唔同，最靚當然係二、三月櫻花盛開嘅時間。呢度嘅櫻花品種極多，台灣山櫻、八重櫻、寒山櫻、富士櫻、牡丹櫻都有。霸戲哥同豬視妹去過咁多次台灣，次次都話要嚟，但因為阿里山海拔二千幾公呎，霸戲哥怕高山症又畏寒，同埋傳聞架小火車成日出事，所以都係睇節目當去咗算啦。