霸戲哥之日常#284｜ 狗狗翻譯機

大爺雞連續三日冇屙尿出界，見佢咁乖，仲諗住整隻雞髀過佢做獎勵，點知隻衰狗哼一聲頭也不回咁閃開，唔知係咪嫌隻雞髀唔夠新鮮定啲肉太鞋。

狗狗雖然係人類嘅最佳玩伴，但lost in translation永遠係我哋嘅最大鴻溝。人類只能憑經驗，從狗狗嘅表情、叫聲、尾巴嘅擺動狐度同幅度，發出嘅氣味，去估狗狗想點，而十次有九次都係錯。唔通真係要搵動物傳心師？

但原來係不久嘅將來，講緊係5至10年時間，就會有專為狗狗奴僕而設嘅翻譯機面世。有咗佢，主子有咩需求，我哋唔使再估估吓。

Netflix最新上架嘅科學紀錄片《未來的》，講述未來科技嘅發展會改變人類嘅生活，包括人同狗嘅相處。科學家會通過收集大數據，包括之前提及嘅狗狗反應，然後作出精密分析，從而判斷狗狗嘅行為意義。換句話講，第日狗狗郁下條尾，你真係會知佢究竟係扭食、屙屎定頭暈身㷫。

但問題係，到底人類願唔願意聽到狗狗嘅心聲？萬一發現狗狗其實好討厭我哋又點算？

寫到呢度，大爺雞又眼超超啤行我。唔使翻譯機都知，佢要我鋪報紙畀佢去屙屎啦！

霸戲哥

** 博客文章文責自負,不代表本公司立場 **

睇咗一個禮拜J2新節目，霸戲哥同豬視妹果然冇走漏眼，估中奶仔主持嘅《貧窮限制想像》會係最具話題性，始終我哋呢班活喺貧窮線下嘅地底泥，都想知啲富豪除咗酒色財氣，仲可以玩啲乜。

噚晚嗰集主角係「威斯霸王」，係一位古董收藏家，每件珍藏品閒閒地幾萬蚊起標。但最爆嘅唔係佢啲古董，而係夾埋奶仔蝦港姐冠軍黃嘉雯，設計老屈佢打爛古碗。難為入世未深嘅Carmaney上晒當，心諗拍集節目無啦啦嘔突，大拿拿八萬蚊真心喺鏡頭前喊出嚟。

講起古董，話說霸戲哥個伯父以前做生意搵到錢，都買落唔少古董嘢，仲擺到一屋都係爛銅爛鐵。可惜佢啲仔女唔識貨，搬屋時當垃圾散晒去摩羅街，諗番起都三十年前嘅事。如果堆古董今日仲喺度，我諗至少都值成千萬。

不過就正如威斯霸王嘅名言：失敗之後唔好去諗，向前走啦。