霸戲哥之日常#290｜ 德寶

如果要講香港電影黃金年代，唔可以唔提德寶電影，一間能夠喺八十年代，同嘉禾、新藝城鼎足而立嘅公司。

德寶當時主攻中產市場，標榜嘅係quality film，除咗主流嘅商業片，偏鋒嘅題材都夠膽試，為市場提供多元化選擇之餘，亦培育到一班電影奇才，為之後嘅黃金年代奠下根基。

除咗《秋天的童話》，霸戲哥最鍾意就係《富貴逼人》，記得細個真係會攞利是錢出嚟數/拋，畀老母鬧到飛天。德寶亦拍好多社會議題嘅戲，好似《聽不到的說話》、《癲佬正傳》咁，至今仍然係霸戲哥嘅至愛。

香港電影資料館，喺今個月30號至12月18號，特別選映30部德寶作品，當中有10套仲係35毫米菲林版本，後生嘅影迷要把握機會買飛入場感受吓。

相關網站：www.filmarchive.gov.hk/zh_TW/web/hkfa/pe-event-2022-dnb.html

霸戲哥

** 博客文章文責自負,不代表本公司立場 **

七一回歸紀念日，又撞正八號風球，係咪好興奮無心睡眠呢？出動到咁爛嘅tag，因為今晚正正係諗住寫J2節目《無心睡眠》。今集講到台北夜生活，睇到霸戲哥同豬視妹思鄉病發。

不過我哋去台灣都大大話話超過十次，到咗夜晚十點打後，除咗逛夜市，夾吓公仔同飲飲食食之外，真係冇乜特別消遣，或者我哋唔識窿路啦。

但因為一齣《華燈初上》，當堂令台北多咗個新蒲店，就係集中喺中山區嘅日式酒店。台灣人叫嘅「酒店」，其實即係我哋嘅「夜總會」，有歌唱有酒飲有小姐陪嗰隻。當然呢啲打開門做生意嘅，唔會係色情架步啦。客人男女都有，主要係中產高消費人士，朝早辛苦完夜晚落嚟relax吓，第朝繼續博殺。

等疫情過後，都要帶豬視妹嚟過吓燈紅酒綠嘅花花世界。