霸戲哥之日常#286｜ 山旮旯攝影比賽

曾經有一段時間，霸戲哥好沉迷行山同攝影，仲特登買咗人生第一部無反相機xt-10同長鏡，方便一路行山一路打蝶。

當年究竟有幾狂熱？就係未到周末已經心思思搵掟去，甚至做足功課，睇吓邊段行山徑適合新手如我同豬視妹。只要約齊腳，就算天時暑熱都會成行。當然，我哋揀選嘅行山路線，都係山旮旯為主，每次都有如探索秘境嘅感覺。

近年新冠疫情爆發，港人屈埋屆埋冇掟去，居然選擇報復性行山。後來當城門水塘仲多人過旺角嘅時候，霸戲哥連同部富士相機唯有黯然淡出呢個行山界。

不過，港產片《緣路山旮旯》團隊最近舉辦咗個名為「香港真係好靚」嘅攝影比賽，由黃修平、陳詠燊、麥曦茵等做評審，得獎作品會喺高先電影院展示，仲有機會贏取FUJIFILM同FOTOMAX嘅獎品。睇嚟霸戲哥要重出江湖啦！

套戲由黃浩然執導，睇過《點對點》同《逆向誘拐》嘅讀者都知，黃導深愛香港，新戲借岑珈其同五位女主角蘇麗珊、張紋嘉、梁雍婷、陳漢娜、余香凝發展嘅五段情，去記錄香港最山旮旯嘅地方：包括下白泥、荔枝窩、沙頭角、大澳同長洲嘅面貌，好值得大家入場睇。

霸戲哥依家叉住電先，下個禮拜等好天就會出動。

霸戲哥

** 博客文章文責自負,不代表本公司立場 **

如果時光可以倒流，霸戲哥一定揀有得讀木工嘅學校，而唔係着重PhyChemBio嘅so-called傳統名校。點解？讀木工，技藝係跟你一世；讀Physics呢？知道F=ma又點，對你嘅生活係完全冇任何幫助。

所以霸戲哥好羨慕一啲學過木工而又玩得叻嘅人，成日諗如果有機會學，一定會自己設計過晒啲傢私，就算做得唔好，點都好過用實惠、宜家嗰啲倒模傢私咁枯燥乏味。

今集《喂喂喂 你話你係邊個邊個》主角文偉，就係一名木工匠，佢對設計亦有一份執着，鍾意將自己嘅想法注入產品入面，所以每件作品都係獨一無二。文偉本身係裝修師傅，工餘時間就返去自己嘅小天地，設計一啲小擺設，佢形容為「放空」。人生能夠搵到自己嘅天地，又可以寓工作於娛樂，夫復何求？

或者霸戲哥認真諗吓學木工，聽朝走去後山執舊木頭鋸吓先。