去年年底，CY到北京述職時仲同記者講，APEC財長會係國家俾香港一個重要任務，但如今突然剎停，咁樣換開會地點，都算係近年罕見事件。
雖然罕見，但諗深一層，阿爺有呢個決定又唔係太意外。過去一年，有接觸過所謂收風員的人都知，個個嚟親問到的話題，基本上離唔開佔中，由佔中咩人發起？準備點樣搞？會有幾多人參與？到近期已經係問得更仔細，如果佔中，會點樣影響香港呢？例如佔領中環，到時交通大擠塞，成個中環被癱瘓晒時可以點做呀，最壞的情況會去到邊，會唔會出現大動亂等等。
記住，呢啲收風員係廣泛地去收風，包括埋泛民佢哋都會接觸，以求全面評估形勢。如今睇嚟中央都唔敢假設佔中一定可以和平理性，不影響到香港的社會穩定，否則就唔會作出剎停APEC會議的決定。
阿爺已經覺泛民可能會玩出火，加上近期闖軍營、「驅蝗」遊行，多多少少都影響北大人的睇法，要全面部署點樣應對，首先就係唔搞APEC呢場國際SHOW，免得俾你操控晒局面，利用APEC開會時爆大鑊，投鼠忌器。
一向以來阿爺俾人有個印象，凡係國際會議時，都俾吓面讓三分，依家可以咁大轉變，將個會移離香港開，可以預期阿爺開始作最壞打算，對形勢的評估不會樂觀，起碼比起去年決定財長會喺香港舉行時悲觀，先至出現今天的剎停。到時萬一面對不可預測的局面時，中央都係會出硬手喇。
Ariel
** 博客文章文責自負,不代表本公司立場 **
在政治的世界真係冇永遠的敵人，想當年被視為代表工商利益的自由黨同代表中產基層的民主黨在議會上，不單止喺民生議題嗌餐死，在意識形態內，俾人感覺都好似大纜扯唔埋。
今日睇電視新聞，竟然見到自由黨同民主黨的頭頭們排排坐喺台上開記者會，原來兩個黨共同研究點樣改善香港公共醫療的建議，發表30頁的報告。有人會諗上周六「雙辣招」草案，泛民離場，自由黨反對，都企喺不支持政府的一邊，係咪依家兩個黨多咗共通話題呢，愈行愈埋呢？
原來兩黨共同研究呢份報告幾個月架喇，呢次破天荒首次合作推政策建議，自由黨就強調同政府高官唔出席佢哋的黨慶無關係，民主黨就話在民生議題上其實可以有更多跨多黨派的合作。
代表唔同階層利益的黨派可以咁合作無間，真係值得學習學習，咁又係喎，一個叫自由﹐一個叫民主，「自由民主」正正係經常講的普世價值，所以話，建黨立派時，改名真係一門功夫嚟架。
