博客文章
唔使等到2046，《男兒當入樽》電影版已確定今年12月3號喺日本上映。至於香港有冇得上映？使唔使走到世界的盡頭先有得睇？暫時未知。
《男兒當入樽》可以話影響霸戲哥一生。雖然籃球之神Michael Jordan先係啟蒙，但令我癡迷咁迫自己變強嘅，一定係呢套漫畫。入面嘅角色無論係主角櫻木、流川、仙道、三井，抑或冇咁起眼嘅宮城、木暮、赤木，甚至乎被設定為「壞人角色」嘅魚住、福田、花形呢啲，都有熱血嘅一面，好容易搵到代入位。
結果成個中五，霸戲哥與籃球同《男兒當入樽》為伴，會考就咁炒晒，升唔返原校。係咪影響咗我一生呢……
到後來出嚟做嘢，有位德高望重又學富五車嘅文壇巨人，居然話未睇過男兒當入樽，我二話不說將成套漫畫送上，佢好似發現新大陸咁如獲至寶。講起又想念呢位老友添。
講番呢套電影版，打籃球畫面係用真人動作，再配合電腦3D技術加工而成，估計都係用motion capture啦，令籃球嘅速度感同對抗性，比較像真咁呈現。寫到呢度，霸戲哥已經感受到籃球場上霹靂啪嘞嘅腳步聲，我嘅熱血返晒嚟！
霸戲哥
** 博客文章文責自負,不代表本公司立場 **
倪匡先生先行一步了，喺地球活到87歲，係時候拜訪其他星球吧。
利申，霸戲哥從來唔係衞斯理迷，見同學個個拎住本《藍血人》、《支離人》、《老貓》出入「霍英東圖書館」，唯獨我借《主席手記》、《捕捉女王》同《天子門生》，自覺同畢華流一樣咁不入流。認真，當時對倪匡先生嘅認識比倪震更少，同埋印象中佢只係《今夜不設防》入面又煙又酒嘅老頑童。
人大咗，先知倪匡先生最叻唔係日寫萬字嘅天賦，而係佢瀟灑嘅處世態度，同埋對貝殼嘅鍾愛與認識。一個人到底又幾奇怪，先會對貝殼癡迷成咁？當刻立志，若有機會見到倪匡本尊，一定要討論貝殼，好歹都叫做讀過吓marine biology。
後來霸戲哥因工作關係，真係有幸同倪匡先生有過幾面之緣。第一次最無稽，話說有次要電話訪問前輩關於《精武門》，類似陳真係咪真有其人之類。當刻霸戲哥戰戰兢兢，一來擔心打擾老人家，二來問啲咁無聊問題怕失禮。電話比想像中容易接通，遠處傳來一把《今夜不設防》嘅熟悉聲音，倪大俠非但冇嫌霸戲哥無聊，仲同我傾足10分鐘偈，最後居然唔記得問陳真個蠢問題。
之後倪匡有段時間要錄影霸戲哥有份製作嘅節目，而咁啱我係少數聽得明佢講乜嘅人，順理成章負責接待對方。我敢講倪匡絕對係奇人， 係出奇地完全零架子，比起其他薄有名氣嘅文化界前輩平易近人一萬倍。記得當時一有空檔，霸戲哥都會主動同倪匡先生傾偈，每次都有嘢袋落袋。
但霸戲哥竟然唔記得討論貝殼……呢個反而成為咗我嘅遺撼。
人總有一死，遺體最終都會化作星塵。但我相信倪匡先生嘅離去，呢個世界係會少咁啲嘢。
