霸戲哥之日常#300｜ Sam哥

呢個世界已經再冇任何嘢可以阻止Sam哥繼續拍《極鬪》。就算新冠疫情令全世界停擺，Sam哥都冇停過來，繼《極闘10 TV屍》上年上映完，《極鬪11零下八度》已經開始動工，最近更發佈海報同「首輪」預告片。

唔經唔覺，認識Sam哥梁成致都接近8年。當時上司有遠見，想我做啲另類人訪，而Sam哥當時自資拍咗幾套低成本cult片《殺屍‧喪變》、《TV屍》同《屍小姐Z》，甩頭甩骨得嚟又好有個人風格，霸戲哥實在好奇Sam哥點會有燒錢念頭，二話不說約訪問。

初次接觸Sam哥，已被對方氣場壓倒，人到中年嘅佢完全冇半分蒼老疲態，叫佢打兩嘢沙包，Sam哥一口氣連打五分鐘仍氣定神閒，以前肯定「食過夜粥」。Sam哥咁打得，點估到份人斯文到你驚，完全同佢個人設極度違和。傾開先知，Sam哥係超級戲癡，因為極度崇拜George Romero嘅喪屍片，所以有機會都想圓夢。

就係呢個小小心願，Sam哥嘅《極鬪》拍完一部又一部，而且每部都有顯著進步，雖則同專業仲有段距離。但人哋講緊係千萬製作，Sam哥嘅戲好難同正規電影比較。

戲名《極鬪》，意思就係喺人生路途上，不停挑戰自己。霸戲哥深信Sam哥呢團火係永遠都唔會熄滅。

期待《極鬪11零下八度》有新突破，預告片我見到出動埋航拍啦。

霸戲哥

** 博客文章文責自負,不代表本公司立場 **

有人追求長生不老，有人渴望永垂不朽。但人死燈滅，殘餘嘅軀殼最終化作養料，循環再生。如果要科學化啲咁講，就係人體組織分解再重組，成為其他物質。邊個講法都好，基本上人一死，喺呢個世界上就唔會再有任何聯繫。

呢番說話今日講都仲未錯，但5年後就好難講。

霸戲哥之前介紹過嘅Netflix紀錄片《未來的》，其中一集題材係往生。科學家已經着手研究，人死後依然可以同世界聯繫。現時已經有綠色葬禮，遺體唔再火花，而係轉化為肥料（compost），再用嚟種樹。換句話講，棵樹就係先人嘅after life。

以現今科技，每人死前都會留下好多視像、照片同聲音記錄，呢啲統統可以儲存喺digital世界。試想想將呢啲data同棟樹結合，咁後人「拜祭」棟樹時，就可以一覽先人嘅生存記錄，亦可透過電腦科技，重塑番死者生前原貌、還原聲線，甚至透過AI同在世者對話。

從此以後，人死唔係終結，而只係另一個開始。