霸戲哥之日常#307｜ 真我個性

霸戲哥成日諗，唱歌好唔好聽，係冇絕對客觀嘅標準。當然，學過唱歌同唔識唱歌係有明顯分別，但你話去到專業水平，又或者歌唱比賽個個咁高咁大，唱得好唔好聽好取決於評判嘅主觀感受。

所以，霸戲哥、豬視妹同大爺雞無聊起上嚟，都會匿埋做《聲夢傳奇2》評判，測試下自己嘅眼光同聽力。（大爺雞以搖尾嘅頻率去評分）

睇勻《聲夢2》一班學員，霸戲哥同豬視妹不約而同喜歡毫不起眼嘅Maggie趙頌宜。大家有冇聽過「猜垃圾」？細個踢波分隊，兩隊長包剪揼揀人，揀到最尾冇人要者，為之「猜垃圾」。Maggie就係屬於呢類，第一輪冇導師揀佢，最尾先掹車邊畀林二汶揀中。

Maggie冇美麗外表，表情僵硬無厘笑容，惟獨把聲夠獨特，沉厚得嚟又磁聲，絕對係得天獨厚。噚晚佢一開聲唱《我的心裡只有你沒有他》，已經震撼全場。最重要嘅係，Maggie擁有真性情，唔會矯情造作扮可愛，始終歌唱比賽鬥嘅係歌藝嘛。

希望Maggie可以越戰越勇，同埋要keep住真我個性呀。

霸戲哥

** 博客文章文責自負,不代表本公司立場 **

為咗履行七年之約，平日瞓到黃朝百晏嘅豬視妹，都願意晨早流流陪霸戲哥睇《迷你兵團2》歡樂早場，慳得幾蚊得幾蚊。

入場之前，霸戲哥都聽聞英國有個怪現象，就係一班所謂嘅「Generation Z」嘅新世代，喺社交媒體發起名為「#Gentleminions」嘅campaign，呼籲年輕人着老西扮紳士入場，但做出有如流氓一樣嘅傻徑，好似叫囂、掟垃圾同企起身拍手呢啲指定動作梗唔會少，至於會唔會干擾到電影播放就不得而知。總之，成個campaign搞到神憎鬼厭，最慘係帶住班細路入場嘅家長，撞到班瘟神都唔知點算⋯⋯

點知霸戲哥睇嗰場都遇到「戲院流氓」，而仲要係帶住細路嚟嘅阿毛。佢仲以為自己六呎高，全場撐住椅背，搞到我哋睇睇吓要坐前一行。好在歡樂早場冇乜人啫。

家長都咁冇品，班細路都唔慌叻得去邊。祝佢哋好運啦。