霸戲哥之日常#303｜ J2監察站(16)：遇溺自救法

霸戲哥好多求生技能，都係老爸教。最記得6歲去泳池學游水，老爸嘅教法相當另類，就係拖我去成人池度，唔畀我對腳掂池底。人一慌，求生意識就出現，掙扎幾秒後就學識踩水，同日學識埋蛙式。

識得喺泳池游，唔代表跌落大海都冇事。先唔講水流同水溫問題，若然喺海中心突然抽筋，又可以點樣自救？記得老爸就教我浮水，四肢盡量放鬆，再閉目休息，等肌肉慢慢鬆弛。但原來都唔係最佳嘅做法。

今晚播出嘅J2節目《意外步出》，隊長梁諾妍就教大家好多遇溺嘅救援方法，其中亦有教點樣正確應付抽筋狀況，原來真係可以喺水中拉筋嘅。另外，亦有教大家點樣拯救遇溺者，但重點係你要好熟水性，如果唔係拯救者隨時變埋遇溺者。

講到尾，大家都要緊記欺山莫欺水，同埋千祈唔好低估水中遇難嘅風險，因為意外往往就係自視過高之下發生。

霸戲哥

** 博客文章文責自負,不代表本公司立場 **

識得霸戲哥嘅人都知，我係超鍾意阿Sa，雖則未去到同豬視妹關係破裂嘅地步，但基本上阿Sa有份演出嘅戲，霸戲哥都睇過⋯⋯至少一次。

嚟緊7月21號，將會有阿Sa主演嘅新片《神探大戰》上映，就算係爛片，霸戲哥都會盲撐，何況係編劇之神韋家輝自編自導嘅戲，仲有劉青雲主演？

睇最近流出嘅劇照，阿Sa今次繼續破格演出，化咗個「毀容妝」不特止，其中有幕仲要赤腳行屎渠，真係好大犧牲。霸戲哥一直覺得阿Sa係嚴重被低估嘅演員，或者因為太靚女啦，無論幾努力都擺脫唔到花瓶形象，其實佢喺《戲王之王》時已經脫胎換骨，到後來嘅《雛妓》同《非分熟女》都係衝獎之作，可惜都同金像獎無緣。霸戲哥覺得金像獎欠佢一個獎座囉。

唔知同樣鍾愛阿Sa嘅唐牛同唔同意呢？