霸戲哥之日常#310｜ 劉偉強工作室

完全低估咗第三針復必泰嘅威力，連續攤屍幾個鐘仍覺天旋地轉，清醒時原來已經夠鐘睇奶仔嘅《貧窮限制想像》。今集佢帶觀眾參觀劉偉強個超豪電影工作室。

霸戲哥早幾年因工作關係，不時到訪電影導演嘅工作室，有時係拍嘢，有時做吓訪問咁啦，杜琪峰嗰個都去過，但嗰次就撞唔到順豐步兵（笑）。咁多過電影工作室之中，劉偉強嗰個真係最有印象，除咗擺放林林總總嘅電影道具，最記得有張舊式戲院鐵凳，三個座位係連埋一齊，同埋唔知咪生鐵造，重到癲嘅。霸戲哥相信係六十年代，甚至更遠古時代嘅產物。

劉偉強出名極之好客，當日佢仲親自下廚煮幾道小菜畀大家食，又分享咗唔少做人道理同拍戲趣事。講緊都五、六年前嘅事了。

呢幾年劉偉強喺大陸密密執，所以見佢工作室又「豪華」咗唔少，相信佢個私人影院肯定又Upgrade過啦。可惜嘅係，霸戲哥應該冇得借工作再上去搗亂，好懷念入面部街機呀。

霸戲哥

** 博客文章文責自負,不代表本公司立場 **

Netflix有度好，就係每當你無所事事，你總會喺影片海度撈到節目嚟打發時間。得閒睇又得，唔睇亦冇損失。尋寶真人騷《阿拉斯加金之島》絕對係呢類。

話說阿拉斯加西邊有一個偏遠小島Adak，除咗係二戰時期美軍壓制日軍嘅軍事要地，傳聞以前有海盜喺島度埋下現值3.6億美金嘅財寶⋯⋯但Adak今日已經荒廢，成個島得番45人住。

節目講有班「金幣獵人」，決定出發去金之島掘寶，呢班人並唔係烏合之眾，仲要個個身懷絕技：有人精通使用探測儀，有人熟悉地理氣象，有人甚至識探測地雷同拆炸彈。唔通真係畀佢哋掘到金幣？

掘金紀錄片一共八集，起初睇頭幾集都幾過癮，越睇越覺唔對路。既然呢度有金掘，點解咁耐以嚟，都冇探險隊嚟開發？個腦突然叮一聲，個節目會唔會係大騙局，海盜同財寶又會唔會係老作出嚟？

唯一可以肯定嘅係，呢度真係有好多被棄置嘅炸彈，陣間掘金不成掘中炸彈就gg了。