霸戲哥之日常#319｜ 生化危機

今時今日已經冇乜人講煲劇，依家原來係叫「捱劇」。唔知幾時開始，大家以捱完一套劇為目標，呢種又要睇又要虎嘅精神自虐狀態，實在令人匪夷所思。

串流平台嘅競爭，造成劇集氾濫固然係主因，觀眾要求越嚟越高亦係不爭事實。而最新一齣「以捱為樂」嘅劇，就係Netflix嘅《生化危機》。

Netflix都老實不客氣，劇集版《生化危機》擺明車馬販賣老餅嘅集體回憶之同時，又試下開拓年輕fans市場。但套劇除咗戲名、入面嘅喪屍呀、t-virus之外，同電玩遊戲、甚至乎Milla Jovovich主演嘅電影版係冇任何直接聯繫。故事圍繞Wesker一家說起，並分成兩條時間線，一條係2022年，女主角Jade同妹妹Billie初初搬到New Raccoon City，發現養父Albert Wesker間Umbrella公司秘密進行實驗。另一條係2036年，t-virus已經爆發，人類死剩1500萬人，牆外就有60億喪屍。霸戲哥暫時睇到第二集，雖未算話好睇，但都未去到過「捱」字吖。

講起Capcom呢隻game，最初喺日本叫Biohazard，但隻game移籍去歐美時，因為同Biohazard樂隊撞名，最後因版權關係先改名做Resident Evil。霸戲哥記得第一次玩《Resident Evil》，係三更半夜偷偷出廳玩，因為黑媽媽關係，令隻game更加恐怖，每吓開門凝住有喪屍撲出嚟。而最後其實係霸戲爸媽出嚟「冚檔」。眨吓眼就二十幾年……

霸戲哥

** 博客文章文責自負,不代表本公司立場 **

噚日賽馬煞科，聽聞今年投注總額又破紀錄，全年錄得1400億港元，哈唔知大家啲消費券係咪去晒鋪草皮呢？

大家焦點可能落咗喺尾場爆出個大冷門，由潘明輝策騎嘅「安遇」勝出，獨贏派彩$1997（霸戲爸中咗），霸戲哥就反而留意到主持話，下季賽馬節目同六合彩（9月5日起），都唔再喺J2台播，而改喺85台無綫財經‧資訊台播。

原來唔經唔覺，賽馬喺J2台播都差唔多7年，亦因為咁J2畀人叫做「賽馬台」。但J2嘅定位本身係target年輕人，冇理由鼓吹年輕人賭博啫，其次係J2長期受制星期三夜馬影響，打亂晒黃金時段嘅部署。今後搬去85台，J2可以利用番星期一至五嘅黃金時段去累積觀眾群，唔使再勒住勒住。

霸戲哥相信今次呢個節目調動，對於觀眾同J2嘅長遠發展嚟講，都會係好事嚟嘅。