風波不斷的良心電視台的亞記又傳出高層被炒風波，話說靚仔執行董事盛品儒被踢出亞視後，高層一輪大執位，走到七七八八，最後由大公報調到亞記、有份炮製「ATV焦點」的雷競斌，接手做咗執行董事。但近日又起風雲，聞說人稱吔叔的雷競斌被撤銷執行董事職務，但就未知他是否願意繼續留任高級副總裁。
冰封三尺非一日之寒，舊年八月，通訊局公布王征操控亞視的調查報告，重罰一百萬元，執行董事盛品儒被勒令解除職務，無幾耐，吔叔接任執行董事。聞說本身都幾惹火的吔叔上台後，多次與王征支持的管理層衝突，春節前更一度要炒咗王征親信的財務總監，其後又發出內部通知，指果名財務總監認錯後已復職，據了解，事件背後其實就係吔叔與主要投資者王征爭奪控制權。
知情人士話，吔叔認為今次被搣柴，係王征干預亞視管理層運作，令吔叔被搣柴，所以吔叔會去通訊局投訴有人違反「不控制承諾」。
通訊局回覆我哋查詢時，就指確係收到一名公眾人士就亞視的控制和管理作出的投訴，按既定程序處理。亞記面對續牌諮詢仲未夠煩乎，仲搞咁多嘢，亞記亂局幾時完呢?
Ariel
** 博客文章文責自負,不代表本公司立場 **
去年年底，CY到北京述職時仲同記者講，APEC財長會係國家俾香港一個重要任務，但如今突然剎停，咁樣換開會地點，都算係近年罕見事件。
雖然罕見，但諗深一層，阿爺有呢個決定又唔係太意外。過去一年，有接觸過所謂收風員的人都知，個個嚟親問到的話題，基本上離唔開佔中，由佔中咩人發起？準備點樣搞？會有幾多人參與？到近期已經係問得更仔細，如果佔中，會點樣影響香港呢？例如佔領中環，到時交通大擠塞，成個中環被癱瘓晒時可以點做呀，最壞的情況會去到邊，會唔會出現大動亂等等。
記住，呢啲收風員係廣泛地去收風，包括埋泛民佢哋都會接觸，以求全面評估形勢。如今睇嚟中央都唔敢假設佔中一定可以和平理性，不影響到香港的社會穩定，否則就唔會作出剎停APEC會議的決定。
阿爺已經覺泛民可能會玩出火，加上近期闖軍營、「驅蝗」遊行，多多少少都影響北大人的睇法，要全面部署點樣應對，首先就係唔搞APEC呢場國際SHOW，免得俾你操控晒局面，利用APEC開會時爆大鑊，投鼠忌器。
一向以來阿爺俾人有個印象，凡係國際會議時，都俾吓面讓三分，依家可以咁大轉變，將個會移離香港開，可以預期阿爺開始作最壞打算，對形勢的評估不會樂觀，起碼比起去年決定財長會喺香港舉行時悲觀，先至出現今天的剎停。到時萬一面對不可預測的局面時，中央都係會出硬手喇。
